Вахтуниз мажал авач, ада гьамиша виликди еримишзава. Ингье, мад са – 2010-йис тарихдиз фена. Виринра фейи йисан нетижаяр кьазва, нубатдин йис патал планар, тамамардай кIвалахар тайинарзава. Алатай гьафтеда «Сулейман-Стальский район» муниципальный райондин Кьил, райондин депутатрин Собранидин Председатель Нариман Шамсудинович Абдулмуталибова райондин администрациядин управленийрин начальникрихъ, райондин са жерге къуллугърин руководителрихъ галаз алатай йисан нетижаяр кьуниз ва алай йис патал везифаяр тайинаруниз талукьарнавай совещание тухвана.
Ам ачухуналди Нариман Шамсудиновича къейд авурвал, алатай йис район, адан агьалияр патал писди хьанач. Районда социальный, экономикадин, аваданламишунин, агьалийрин яшайишдинни дуланажагъдин шартIар хъсанарунин ва маса рекьерай еке кIвалах тухвана. Кьилди къачуртIа, вичихъ район патал еке метлеб авай «Сардархуьр-ДаркIушкъазмаяр» водоводдал кIвалахар давамна, экономикадин, хуьруьн майишатдин хилериз инвесторар желбна, хейлин майданра цIийи багълар, уьзуьмлухар кутуна, райондин центральный больницадин, культурадин Дворецдин ва маса дараматар капитальнидаказ ремонт хъувуна, умуми образованидин ва спортдин школайрин, ясли-бахчайрин материальный база мягькемарна, Ичина ва Эминхуьре школайрин цIийи дараматар эцигун пландик кутуна ва гзаф маса кIвалахар тамамарна. Санлай къачурла, фейи йис район патал хъсанвилихъди дегишвилер кьиле фейи йис хьана.
Совещанидал рахай райондин администрациядин Кьилин 1-заместитель Мусаиб Гьажибалаевич Агьмедова, заместитель Савин Мирзоевич Велиева, чилерин ва эменнидин управленидин начальник-райондин администрациядин Кьилин заместитель Назим Къурбанович Алискерова, администрациядин экономикадин управленидин начальник-администрациядин Кьилин заместитель Рамиз Абдулашимович Муталибова, контрольно-счетный палатадин председатель Къехлер Къазимегьамедович Аскерова, эцигунрин ва ЖКХ-дин управленидин начальник Герман Адилович Гьуьсейнова, агьалияр яшайишдин жигьетдай таъминардай управленидин начальник Жавидин Бремович Бремова, финансовый управленидин начальник Магелан Темирханович Рагьимова, образованидин управленидин начальник Жабраил Агъамирзоевич Асланова, ЦРБ-дин кьилин духтур Максим Играмудинович Ханбалаева, хуьруьн майишатдин управленидин начальник Мегьамедзагьид Мегьамедсадикьович Бабаева ва маса юлдашри чпи гуьзчивалзавай ва чеб кьиле авай къуллугъри алатай йисуз авур, кьилиз акъудай кIвалахрикай, гьакIни вилик акъвазнавай везифайрикай гегьеншдиз суьгьбетна.
Совещанидин нетижаяр кьуналди, Нариман Шамсудинович Абдулмуталибова къейдна хьи, районда алатай йисуз авур кIвалахрин, хъсанвилихъ кьиле фейи дегишвилерин кьадар тIимил туш. Гьа са вахтунда, хъувуна кIанзавай кIвалахрин кьадарни гзаф я. Нариман Шамсудиновича абурукай гегьеншдиз лагьана, гьар са управленидин, къуллугъдин фикир абурал желбна, меслятар къалурна.
- Райондихъ дурумлудаказ вилик фидай, экономика мягькемардай, агьалийрин яшайиш мадни хъсанардай мумкинвилер, шартIар ава, - къейдна Нариман Шамсудиновича. – Инанмиш тирвал, виридан куьмекдалди чалай и крар алакьни ийида.