73-йисан яшда аваз чи арадай яргъал чIугур азардикди машгьур алим-экономист, хъсан руководитель Исрафилов Максим Алиевич гьамишалугъ яз акъатна.
М. А. Исрафилов 1937-йисан 3-сентябрдиз Кьасумхуьрел дидедиз хьана. 1955-йисуз Кьасумхуьруьн юкьван школа акьалтIарна. Адалай гуьгъуьниз и школада пионервожатыйвиле кIвалахна.
1956-йисуз Дагъустандин гьукуматдин университетдин «Историко-филологический» факультетдик кIелиз экечIна.
1961-йисуз а чка агалкьунралди акьалтIарай ада Шихидхуьруьн юкьван школада урус чIалан тарсар гана. 1963-йисуз ам ВЛКСМ-дин райкомдин кьвед, гуьгъуьнлай сад лагьай секретарвиле хкяна.
1967-1968-йисара Дондал алай Ростов шегьерда высший партийный школа акьалтIарна.
1970-йисуз Кьасумхуьрел партиядин райкомдин отделдин заведующийвиле кIвалахна.
1971-1973-йисара Азербайжандин гьукуматдин университетда аспирантура акьалтIарна. Гуьгъуьнлай ДГУ-да экономический теориядин муаллимвиле, гьа са вахтунда парткомдин секретарвилени кIвалахна.
1987-2005-йисара ДГУ-дин культурадин факультетдин декан хьана.
М. А. Исрафиловаз вичи кIвалах авур коллективра работникрин, тарсар гайи студентрин арада гьуьрмет ва авторитет авай. Педагогвилин кIвалахда къазанмишай агалкьунрай адаз ДР-дин культурадин лайихлу деятелвилин, «Доцент экономической теории» тIварар, гьакIни республикадин Гьукуматдин хейлин гьуьрметдин грамотаяр гана.
Максим Алиевичан гъилик чирвилер къачур пешекарри республикадин вири пипIера, адан сергьятрилай яргъарани гьакъисагъвилелди зегьмет чIугвазва. Хъсан инсан, вафалу юлдаш хьайи Максим Алиевичан экуь къамат чи рикIера гьамишалугъ яз амукьда.
Чна адан хзандиз ва мукьва-кьилийриз, дериндай хажалат чIугунивди, башсагълугъвал гузва.
Н. Ш. Абдулмуталибов, Ш. Гь. Мегьамедханов, М. Гь. Агьмедов, С. М. Велиев, Р. А. Муталибов, Н. К. Алискеров, М. К. Наджафов, Б. К. Бремов.