И мукьвара Кьасумхуьруьн 2-нумрадин юкьван школада муаллимрин педсоветдин заседание хьана. Анал и школадин завуч Ф. Агъаханова гегьенш доклад авуна. Ада алатай четвертдиз аялрихъ кIелунра хьайи агалкьунрикай, гележегда муаллимрин ва аялрин вилик акъвазнавай везифайрикай лагьана, нетижаяр кьуна.
Педсоветдин заседаниядал гьакI директордин заместитель П. Мегьамедова, классрин руководителар тир К. Лукьманова, Р. Бабаева, П. Нежведилова, С. Селимова, В. Якьубова, Г. Ибрагьимова рахана ва абуру школада алай вахтунда тербиядин кIвалах авай гьалдиз анализ гана.
Школада кIелзавай аялрин низам-къайда вини дережадиз хкажун паталди чпин тежрибадикай лагьана ва и карда диде-бубайрихъ галаз сих алакъаяр мадни мягькемарун чарасузди яз къейдна. И кIвалахдин нетижа яз алай вахтунда школада пIапIрус чIугвазвай, ички ишлемишзавай са аялни тахьун и карди тестикьарзава. Педсоветдал школадин директор Велиев Мамед Велибековича сад лагьай четвертда школадин вири педагогический коллективди тухвай кIвалахдиз талукь къимет гана, ЕГЭ алатай йисара хьиз уьзуьагъвилелди вахкуниз гьар са муаллимди дериндай фикир гана ва и кIвалах къайдадик кваз тухвана кIанзавайдакай лагьана.
Кьилди къачуртIа 10-11 классра авай аялар ЕГЭ-дин экзаменар вахкуниз лазим къайдада гьазурна кIанзавайди къейд авуна. Гьа са вахтунда коллективди тарсарилай къеце пата тухузвай кIвалахдиз дериндай анализ гана ва и карда амай кимивилер арадай акъудунин рекьер къалурна. Педсоветдин эхирдай тайин тир къарар кьабулна.