2010-йисан 25-ноябрдиз чеб РФ-дин УК-дин 162-статьядин 2- паюнай, 126-статьядин 2-паюнин «а», «д», «з» пунктара ва 163-статьядин 3-паюнин «б» пунктуна тайинарнавай жаза гунин тахсиркарвилер авунвай тахсиркарар тир Шихбабаев Вадим Валериковичан, Мукаилов Ислам Арифовичан ва Мукаилов Имран Арифовичан гьакъиндай уголовный делодиз килигуналди, судди абур пудни масадавай кичIерар гана улакь къакъудунай (разбой), инсан чуьнуьхунай, еке кьадар пул истемишунай (вымогательство) тахсиркарар яз гьисабна ва кIеви режимдин колониядиз акъудуналди, абур, талукь тирвал, 14, 12 ва 9 йисан дустагъ атIуналди, азадвиликай магьрум авуна.
Чна гьеле виликамаз чи райондин газетдай районэгьлияр хабардар авурвал, Герейханован хуьруьн агьалияр тир В.В.Шихбабаева, Мукаилов Исламани Мукаилов Имрана, виликамаз меслят хьуналди, чпин чIуру ниятар кьилиз акъудун патал 2010-йисан 28-июндиз чкIул къалурна кичIерар гуналди ва гужалди Р. К. Къагьриманававай адав гвай автомашин къакъудна.
Герейханован хуьруьн 1-отделенидихъ агакьдалди абуру автомашин ва чебни чир тахьун патал К 287 ОТ 05 РУС госнумрайрин ВАЗ-21093 автомашиндин вилик квай ва кьулухъ галай регистрациядин лишанар (знакар) алудна. Хуьруьз агакьайла абуру чинал алукIайла вилер жедай чкаяр атIана виликамаз гьазурнавай спортдин шапкаяр къачуна ва йифен сятдин 10 даз 40 декьикьа кIвалахайла Авчихановрин кIвалерин патав фена. Куьчедал къугъвазвай, 2004-йисуз ханвай, яшар тахьанвай Э. Э. Алиярова акурла Мукаилов Ислама ва Шихбабаев Вадима вилер алай чкаяр атIанвай шапкаяр алукIна, машиндай катна экъечIна, гужалди ам машинда акьадарна. Э. Э. Алиярова чуьнуьхна В. В. Шихбабаев ва Мукаилов Исламни чуьнуьх хьана. Телефондай абуру 1500000 манат пул тагайтIа яшар тамам тахьанвай хтулдиз бас-хасвилер ийида, рекьида лугьуз адан чIехи диде Н. А. Авчиевадиз кичIерар гуз хьана.
Эхь, чIуру ниятар кьилиз акъатнач. Тахсиркарар вири чпин жазадив агакьна.
Н. С. Къехлеров, С. Стальский райондин прокурор, юстициядин советник
