12-декабрдиз, вири россиявийри хьиз, чи районэгьлийрини государстводин сувар - Россиядин Федерациядин Конституциядин Югъ къейдзава.
Вичин 17 йис тамам хьун цIи чна къейдзавай Россиядин Федерациядин Конституция кьабулуникай Россиядин государственностдин тарихда лап важиблу вакъиа хьана, ада Россия демократвилелди вилик финин чеб дуьньядин сообществода вирида гьисаба кьунвай принципрал элячIун лишанламишна. Муракаб гзаф кьадар гьерекатрихъ ва вакъиайрихъ галаз алакъалу яз хьайи алатнавай йисара, элячIунин девирдин четинвилер гьалтнатIани, Россияди демократия кIвачел акьалдарунин, политический ва экономический реформаяр кьиле тухунин рекье, инсандин ихтиярар ва азадвилер пайгардаказ хуьн патал шартIар яратмишунин, адалатлу государстводин ва гражданвилин обществодин дибар мягькемарунин рекье виликди еке кам къачуна.
Эхиримжи йисара Россиядин Федерациядин виликан Президент В. В. Путинан регьбервилик кваз галай-галайвал уьмуьрдиз кечирмишай, гила Россиядин Федерациядин Президент Д. А. Медведева давамзавай политический рекьи, обществодин уьмуьрда хъсанвилихъ арадал къвезвай дегишвилери Россия социальный прогрессдин, Россиядин экономикадин къудратлувал ва руьгьдин гьуьндуьрвал арадал хкунин рекье аваз галай-галайвал мадни вилик фин патал къулай шартIар яратмишзава.
Дагъустандин халкь Россиядин Конституциядиз кIевелай вафалу хьун, ам конституционный къурулушдин, государстводин интересрин къаравулда кIевелай акъвазиз гьазур яз хьун - им дагъустанвийри алай девирда уьлкведин вилик акъвазнавай жавабдар месэлаяр гьялуник лайихлу пай кутунин заминвал я.
Играми районэгьлияр, за квез государстводин сувар - Россиядин Федерациядин Конституциядин Югъ рикIин сидкьидай мубаракзава. Заз квехъ мягькем сагъламвал, ислягьвал ва хушбахтвал, Дагъустандин абадвал патал, чи чIехи Ватандин -Россиядин абадвал патал вири крара агалкьунар хьун рикIин сидкьидай кIанзава.
«Сулейман-Стальский район» муниципальный райондин Кьил Н. АБДУЛМУТАЛИБОВ