Алай йисан 25-31-октябрдиз Красноярский крайдин Ачинск шегьерда 1996-1997-йисара дидедиз хьайи жаванрин арада Красноярский крайдин кIвенкIвечивал патал боксдай акъажунар кьиле фена. Ана 330 жаванди иштиракна. Абурун арада Красноярск шегьердин хкянавай командадик кваз чи районэгьли Мурадханов Рустамани иштиракна ва вичин заланвиляй (50кг) 1-чка къазанмишна. Турнирдин нетижайрал асаслу яз, адаз медаль, Гьуьрметдин грамота, къиметлу ва пулдин пишкешар гана.
Рустам 1997-йисуз Кьасумхуьрел дидедиз хьана. Ада боксдай сифтегьан вердишвилер ЦIийи поселокдин юкьван школада кIелзавай йисара райондин 1-нумрадин ДЮСШ-дин тренер Демиров Герман Тажидиновичан, гуьгъуьнлай Мегьарамдхуьруьн райондин Советское хуьре Миметов Агъахан Камиловичан гъилик къачуна. Миметован гъилик вердишвилер къачузвай йисара Мегьарамдхуьруьн райондин кIвенкIвечивал патал тухвай турнирра Рустама 3 йисуз галаз-галаз сад лагьай чкаяр къазанмишна.
2009-йисуз Р.Мурадханов вичин диде- бубадихъ галаз Красноярск шегьердиз акъатна. Спортдал рикI алай жаванди Красноярский крайдин лайихлу тренер Бессараб Федор Васильевичан ( ада вичин спортдин рехъ ДР-дин Каспийск шегьерда башламишна) гъилик боксдай ва Кикбоксингдай вердишвилер къачун давамарна.
18-25 ноябрдиз Омск шегьерда Ермакан кубок патал чIехи турнир кьиле фена. Ана са шумуд крайдайни областрай атанвай 800 касдилай виниз жаванри иштиракна. Красноярск шегьердин хкягънавай командадик кваз и турнирда иштиракай Рустама 3-приздин чка къазанмишна.
Алай вахтунда Рустама 17-декабрдиз Красноярскда Щорсан кубок патал кикбоксингдай кьиле фидай акъажунриз гьазурвал аквазва.
Чна чи районэгьли Рустамаз спортдин рекьяй къазанмишнавай еке дережаяр мубаракзава ва гележегда адахъ мадни еке агалкьунар жедайдак умудар кутазва.
А.КАМИЛОВ