Гзаф йисара чи райондин гьукумдин къурулушда жавабдар къуллугъар авур партиядин ва зегьметдин ветеран тир зак, гзаф масадбурук хьиз, чи уьлкведа ва республикада арадал атанвай чIуру гьалари – ришветбазвили, диндин экстремизмди, терроризмди еке къалабулух ва теспачавал кутазва.
«Демократиядикай», а гафунин асул манани тийижиз, са бязи къуватри чпин хсуси интересар вилик кутаз, виш йисара са хзан яз, дуствилелди яшамиш хьайи, шумудни са чапхунчийрин хура викIегьвилелди акъвазай, чи азадвал ва аслутуширвал хуьн патал чпин чанарни гьайиф татай Дагъустандин халкьарин садвал къакъудиз, абурукай намус пулунихъ маса гудай руьгьдин лукIар ийиз алахънава. Эхь, уьлкведин экономика базардин алакъайрал элячIнавай, бейкарвал артух хьанвай алай муракаб шартIара абур чи халкьарин дуствилин, стхавилин алакъаяр чIуриз, чакай чпиз муьтIуьгъ лукIар ийиз, чпин чIуру ниятар кьилиз акъудиз алахънава: халкьдин законлу ихтиярар ва азадвилер хуьзвай къайдаяр хуьзвай органрин работникар, халкьдин арада гьуьрмет авай инсанар, динэгьлияр, жавабдар къуллугъчияр вагьшивилелди ягъиз рекьизва. Гзаф дуьшуьшра абуру пак ислам диндикай даях кьаз алахънава. Амма, я исламди, я маса динрани Аллагь-таалади халкьнавай инсан яна кьиникь тебрикзавай кIвалах туш, акси яз ам еке гунагь я. И инсансузвилер, чи обществодиз кутуг тавур маса месэлайрал эхир эцигдай, демократвилин уьмуьрда рикIе кичI авачиз, пакад югъ хъсан жедайдак умудлу яз яшамиш жедай шартIар яратмишдай чкадал и кардиз рехъ тагузвай акси къуватрал эхир эцигдай вахт фадлай алукьнава. И кар РФ-дин руководстводини дериндай аннамишнава ва кар кьетIдай серенжемар кьабулзава.
Жуван вири савадлу уьмуьр халкьдиз къуллугъ авуниз бахшнавай, уьмуьрда активный тереф хуьзвай кас яз за 15-декабрдиз чи республикадин меркезда кьиле фидай Дагъустандин халкьарихъ пуд лагьай Съезддихъ, адан къараррик еке умуд кутазва. Зун зи халкьдин гележег анжах Россиядин къурулушдик кваз, адан къакъат тийир са пай яз виликди фини чи эрзиман мурадар кьилиз акъатдайдахъ, чи гележег секин ва бахтлу жедайдахъ умудлу я.
И. Гь. Ибрагьимов, партиядин ва зегьметдин ветеран
