29-ноябрдиз райадминистрациядин заседанийрин залда райадминистрациядин нубатдин заседание хьана. Ам «Сулейман-Стальский район» муниципальный райондин администрациядин Кьилин сад лагьай заместитель Агьмедов Мусаиб Гьажибалаевича ачухна ва кьиле тухвана.
Анал «Сулейман-Стальский район» муниципальный райондин администрацияди 2010-йисан 31-майдиз 154-нумрадик кваз кьабулай «О выполнении Программы по обеспечению дополнительных мероприятий по снижению напряженности на рынке труда в 2010 году» постановление тамамарзавай гьалдин гьакъиндай месэладиз килигна.
И месэлдай анал гегьенш информация гваз рахай «Центр занятости населения» госучрежденидин директор Н. А. Абдулгьамидова ва гьакIни алава информация гваз рахай райадминистрациядин экономикадин управленидин начальникдин заместитель С. Гь. Вагьабовади къейд авурвал, райадминистрациядин къарар уьмуьрдиз кечирмишун патал и жигьетдай йисакай алатнавай 11 вацра районда тайин кIвалах тухванва. Кьилди къачуртIа, и девирда инсанар кIвалахдалди таъминардай центрдиз гьукуматдин патай куьмек тIалабиз 5198 кас агьалияр атана, учетда 2172 кас бейкарар ава. Ишлемишдай рабочий къуватар артух хьунихъ, кIвалахдай чкаяр бес кьадар тахьунихъ галаз алакъалу яз абур общественный кIвалахрал желб авун тешкилиз жедай, вилик акъвазнавай месэлайрикай сад яз ава.
И девирда 1474 кас общественный кIвалахрал рекье туна, абурукайни 1006 кас, республикадин бюджетдин такьатрин гьисабдай вацра 1700 манат пул гуналди, гьакъи гудай кIвалахрал таъминарна. Аваданламишунин, памятникрихъ ва обелискрихъ гелкъуьнин общественный кIвалахрал 22 кас бейкарар рекье туна.
Республикадин бюджетдин такьатрин гьисабдай вацра 1700 манат пул гуналди, 187 кас вахтуналди тир кIвалахралди таъминарна.
Сифте яз кIвалах жагъурзавай сифтегьан ва юкьван махсус образованидин идараяр акьалтIарнавай 18-20 йисан яшда авай 20 кас жегьилар, республикадин бюджетдин такьатрин гьисабдай са тайин кьадар – 1700 манат пулни гуналди, кIвалахралди таъминарна.
Алай йисакай алатнавай 11 вацра 590 кас бейкаррихъ галаз икьрарар кутIунна, абурукай 401 касди пулунин такьатар къачуна ва чпин карчивилин (предпринимателвилин) кIвалах кьиле тухузва.
Бейкар агьалийрин гьисабдай 364 кас пешекарвилер къачун патал Махачкъала, Дагогни, Дербент шегьеррин кIелдай чкайриз ракъурнава.
- Гьелбетда, чи кIвалахда кимивилер, гьялна кIанзавай месэлаярни амачиз туш, - лагьана вичин рахунра агьалияр кIвалахдалди таъминардай центрдин идарадин директор Н. А. Абдулгьамидова. – Бейкарар яз учетда акъвазнавайбур перерегистрация авун патал тайинарнавай вахтара райцентрдиз атун (иллаки хъуьтIуьн шартIара) гзаф четин акъвазнавай. Алай вахтунда чаз махсус улакь чара авунва, и жигьетдай 50-100 ва адалай виниз бейкарар авай хуьрерин администрацийра и месэла чкайрал фена тешкилдай мумкинвилер жеда.
И месэладай анал хци критика ва чпин теклифар гваз са жерге юлдашар рахана.
Заседанидал гьялай месэладай талукь къарар кьабулна.
Заседанидал алай жуьреба-жуьре месэлайрай анал алай йисан 15-декабрдиз Махачкъалада кьиле фидай Дагъустандин халкьарин 3-Съезддиз гьазурвилер аквазвай гьалдин гьакъиндай анал райадминистрациядин Кьилин заместитель С. М. Велиева куьруь информация авуна.
Ада къейд авурвал, и жигьетдай райондин конференциядиз лайихлу векилар хкягъун патал вири хуьрера агьалийрин сходар кьиле фена, райондин конференциядиз 406 кас депутатар хкянава.
Райондин конференция 3-декабрдин пакаман сятдин 10 даз райондин Культурадин Дворецдин чIехи залда кьиле фида. Делегатрин регистрация и йикъан пакаман сятдин 9 далай и дараматдин дегьлизда (фоеда) башламишда. Чи райондай Дагъустандин халкьарин 3-съезддиз 68 делегат рекье тун фикирдиз къачунва ва абур и конференциядал хкяда.
Гьа иналди райадминистрациядин нубатдин заседаниди вичин кIвалах акьалтIарна.
