Къурбанд сувар-им йисалай-суз 10-11 йикъан фад, мусурман календардай Зель-Хиджа вацран 10 лагьай юкъуз, яни сивер хуьнин суварилай гуьгъуьниз 70 югъ алатайла къейд ийизвай мусурманрин лап чIехи суваррикай сад я.
ЦIинин йисуз Къурбанд суварин югъ 16-ноябрь жезва ва ам гьаждал фенвай ва физвай ксари Арафатдин дагъда акъвазнавайла 15-ноябрдин нянин сятдин 5 далай гьисабда.
И суварин тарих (с. а. с.) Ибрагьим пайгъамбардин девирдилай инихъ гьисабзава ва кьиле тухузва.
Бязи ксари чаз гузвай суалриз жаваб яз заз и сувар кьиле тухунин къайдадикай куьрелди лугьуз кIанзава. Сифте нубатда 15-ноябрдиз кIвале, гьаятда, куьчеда къайда тунилай, гьар са гъвечIи-чIехи мусурманди бедендин михьивал авунилай, башламишда ва пакадин суварин йикъан гьазурвилер аквада. 16-ноябрдиз меслят къалурзава:
1. Экуьнин капI авурдалай гуьгъуьниз диде-бубайрин, багърийрин сурарал фида, дуьаяр кIелда, садакьаяр апайда (агакь тавуртIа, пакадин юкъуз гуда.)
2. Рагъ экъечIна са сят алатайла, яни сятдин 8-даз, суварин капI ийиз хуьруьн мискIиндиз фида. КапI ийизвай (чизвай) бубайриз эркек веледарни чпихъ галаз мискIинриз тухун меслят къалурзава.
3. МискIиндиз физ тежезвайбуру (иллаки дишегьлийри ва аялри) кIвале саналди тир суварин капI ийида.
(КапI авунин къайда «Ассалам» газетра ава ва хуьрерин мискIинрин имамривай чирна кIанда).
4. КапI куьтягьайдалай гуьгъуьниз къурбандар ийида (мал-лапаг тукIвада), садакьаяр апайда, мукьва-кьилийриз, ярар-дустариз, къуни-къуншийриз сувар мубарак ийиз фида. Сувар 3 юкъуз давам жеда.
Къурбандар михьи рикIелди авун лазим я.
Къурбанд авуниз акъатда: йис тамам хьанвай лапаг, кьве йис хьанвай цIегь ва я жунгав.
Лапаг - са -касдилай,- жунгав (мал) 7 касдилай.
Къурбанд ийизвай мал-лапаг тукIваз чидай касдал тапшурмишай-тIани жеда, жув алаз, ван къведайвал, нелай къурбанд ийизватIа гьар са касдин тIвар кьуна кIанда. Алакьиз хьайитIа, жезмай кьван и кар жува кьиле тухун хъсан я.
Къурбанддин як пуд чкадал апайда: са пай кесибриз, кьвед лагьай пай къуншийризни багърийриз, пуд лагьайдини жуван хзандиз тада. Хам маса гудач, хийирлу рекье ишлемишда.
Незир авур (са кар туькIуьн патал хиве кьунвай) къурбанд жува тIуьн тавуна, вири паюн лазим я.
Квез алукьзавай Къурбанд сувар мубаракрай, гьуьрметлу мусурман стхаяр, вахар, азиз балаяр.
Куь садакьаяр Аллагьди кьабулрай ва куьн вири хъсан мурадар Ада кьилиз акъудрай! АМИН!
Османов Фахрудин-гьажи, райондин имамдин заместитель
