Курхуьруьн 2-нумрадин юкьван мектебда и йикъара кьиле фейи нубатдин педсоветдин заседанидал муаллимри, аялри алатай кIелунин йисуз гьикI кIвалахнатIа, гьихьтин нетижаяр арадал гъиз алакьнатIа ва цIинин кIелунин йисуз гьихьтин везифаяр вилик акъвазнаватIа месэлайриз килигна.
И месэлайрай анал мектебдин директор ДР-дин халкьдин муаллим Алхасов Небиюлагьа гегьенш доклад авуна. Докладчиди къейд авурвал, аялри чпин чирвилерни алакьунар школадин ва райондин олимпиадайра иштиракуналди лишанлу авуна. ИкI районда приздин 14 чка кьунай. Им виниз тир нетижа хьана. Мектеб куьтягьай 14 аялдикай 3-да къизилдин медалар къачуна, 12 кас ВУЗ-рикни кIелдай маса чкайрик экечIнава.
Докладчиди бегьерлувилелди зегьмет чIугур са шумуд муаллимдин тIварарни кьуна. Ахпа директордин заместителар тир Э. Абдулазизовани Гь. Шихбабаева чпин нубатдай герек тир информацияр гуналди доклад алава хъувуна. Муаллимри кIвалахда ишлемишна кIанзавай цIийи технологийрикайни лагьана. Заседанидал мектебдин кIвалахдин, психологдин, старший пионервожатыйдин планарни тестикьарна, талукь къарарни кьабулна.
Педсовет тухунин гуьгъуьналлаз РУО-дин методистрин дестени атана акъатна ва абурун жергедай яз Бабаханова Мумината, Рагьимова Сагьадата, Гьуьсейнова Мумината талукь документация къайдада авани-авачни, кIвалахдин методика, цIийивилер гьихьтинбур тунватIа ва маса месэлаярни ахтармишна. Абуру гьакI 2, 3, 4-классра тарсарин, аялрин чирвилерин ери ахтармишна, урус чIалай анра диктантар тухвана.
Тухвай ахтармишунрин ва санлай мектебда кIелунринни тербиядин кIвалахар авай гьалдал абуру разивал авуна, муаллимдин йис агалкьунар аваз акьалтIару-низ эвер гана.
