Эхиримжи вахтара Кьасумхуьруьн самбодинни дзюдодин ДЮСШ-да (директор Ю. Къурбанов) вердишвилер къачузвай спортсменри чIехи дережадин чемпионатрани турнирра къазанмишзавай хъсан нетижайри районэгьлийрик шадвал кутазва. И йикъара абуру Махачкъалада 1991-1992-йисара дидедиз хьайи жаванрин арада самбодай Дагъустан Республикадин кIвенкIвечивал патал кьиле фейи акъажунра иштиракна.
Лагьана кIанда, абуру республикадин шегьеррайни районрай атанвай 300-далай виниз спортсменри иштиракай и акъажунра чпихъ самбодай устадвал ва алакьунар авайди къалурна. Кьилди къачуртIа, гьарда вичин къаршидиз экъечIай 6 пагьливандин винел гъалибвал къачуналди, Сефербегов Навруза (57 кг.) ва Керимов Муслима (68 кг.) 1-чкаяр, 4 касдин винел гъалиб хьайи Алискеров Икрама (82 кг.) 2 ва Лукьманов Алиди (+ 100 кг.) приздин 3-чкаяр кьуна. Абуруз медалар, 1, 2 ва 3-дережайрин дипломар гана.
Винидихъ тIварар кьур спортсменрихъ галаз, и акъажунра 5-6-чкаяр кьур Аскеров Руслана (57 кг.), Мамеев Эмира (90 кг.) ва Устаев Ибрагьима (100 кг.) декабрдин вацра Армавир шегьерда Кеферпатан Кавказдин Федеральный округдин кIвенкIвечивал патал кьиле фидай акъажунра иштиракда.
Къейд авун лазим я, чи спортсменри къазанмишнавай агалкьунрик абурун тренер, самбодай дуьньядин чемпион, спортдин международный классдин мастер Рамазан Къурбанован зегьметдин еке пай ква.