Вуж я и чIехи тIварцIиз лайихлу хьанвай Казимет Абдулашимович ва ам и гьуьрметдиз куь лайихлу авуна?
Лагьана кIанда, Цмуррин хуьряй тир Ягъибеков Абдулашим районда гзафбуруз гьуьрметлу, вичи саки 45 йисуз ветеринарный духтурвиле кIвалах авур инсан яз чида. Малум хьайивал, Казимет Абдулашиман гада я.
- Гьелбетда, зун ветеринарный духтурвилин пешедал ашукьарайди зи дах я, - лугьузва К. Ягъибекова. - Зи дах хьиз, ими Максим, стхаяр тир Абдулманаф ва Литвада яшамиш жезвай Мусаибни ветеринарный рекьяй махсус образование авай пешекарар я. Гьавиляй, гьайванрихъни кIвалин къушарихъ гелкъуьн чи хзандин кар я лагьайтIа, зун кIусни ягъалмиш жедач.
К. Ягъибеков 1970-йисуз Цмуррин хуьре дидедиз хьана. Ада хуьре 8-класс, 1986-йисузни Кьасумхуьруьн 1-нумрадин юкьван школада 10-класс акьалтIарна, кьве йисуз армиядин жергейра къуллугъна. 1988-йисуз Казимет Махачкъала шегьердин ветеринарный техникумдик кIелиз экечIна, 1992-йисуз анаг хъсан къиметар аваз акьалтIарна. Вичин зегьметдин рехъ жегьил пешекарди Кьасумхуьруьн тамарин майишатда ветеринарный духтурвиле кIвалах авунилай башламишна. И везифаяр ада са шумуд йисуз намуслудаказ кьилиз акъудна. КIвалахни ийиз, К. Ягъибекова заочнидаказ Дагъустандин хуьруьн майишатдин академияни кIелна акьалтIарна (2003-йис).
- 1995-йисуз зи дах Абдулашим Цмуррин ветеринарный учас-токдин заведующийвилин кIвалах-дилай пенсиядиз экъечIна, - лугьузва К. Ягъибекова. – Район-дин ветеринарный управленидин начальникдин приказдалди хуь-руьн участокдин заведующийвиле зун тайинарна. Гьа йикъалай къенин йикъалди за и везифаяр кьилиз акъудзава.
Малум хьайивал, К. Ягъибеков кьиле авай участок райондин ветеринарный управленида чIе-хибурукай сад я. И участокдин фельдшер Шихбабаев Измирахъ галаз Казимет Цмуррин, Качал-хуьруьн, Ичинрин, Мехкергърин, Рухунрин, Хпуьхърин, КIахцугърин хуьрерин жемятрин, гьакIни Кьианрин, Чуьхверхуьруьн, Ху-таргърин, Ялцугърин, ХипитIрин куьгьне хуьрера амай 1-5 касдин мал-къарадихъ, кIвалин къушарихъ гелкъвезва.
К. Ягъибекова чаз лагьайвал, ада къуллугъзавай хуьрерин агьалий-рихъ агъзурралди мал-къара, лапагар, кIвалин къушар ава. Абур сагъламбур яз, гьакIни азаррикай хуьн патал Казимет Абдулаши-мовича еке кIвалах тухузва, къайгъударвал ийизва.
- Хуьрер дагъдин участокра сад-садавай къакъатна яргъал мензилра аватIани, зун мукьвал-мукьвал хуьрериз жуван машинда аваз физва, агьалийрихъ галаз профилактикадин кIвалах тухузва, мал-къарадин сагъламвал ахтармишзава, - лугьузва К. Ягъибекова. – Ида вичин тайин нетижа гузвайди гьакъикъи крари къалурзава: эхиримжи вахтара хуьрера малар, лапагар гиликьай, абурук хаталу азарар акатай дуьшуьшар хьанач.
Чаз малум хьайивал, Казимет Абдулашимовичан кIвалахдилай райондин ветеринарный управленидин руководстводи разивални ийизва.
- Казимет Абдулашимович вичин пешедал, мал-къарадал рикI алай, кIвалах хъсандиз чидай, хиве авай везифаяр намуслудаказ кьилиз акъудзавай пешекар-духтур я, - лугьузва управленидин началь-ник Назир Мавлудович Абдулкъа-фарова.
Хъсан пешекар хьиз, Казимет Абдулашимович хуьре-кIвале гьуьрмет авай инсан, чешнелу хзандин кьилни я. Уьмуьрдин юлдаш Муминатахъ галаз ада 5 аял - 4 рушни 1 гада хана, хвена, ахлакь-низам авайбур яз тербияла-мишна. ИкI, гада Рагьмана Астрахандин государстводин юридический университетда, амай аялри Цмуррин юкьван школада хъсан къиметар аваз кIелзава.
Дагъустан Республикадин ветеринарный лайихлу духтур-вилин тIвар мубарак авуналди, чаз Казимет Абдулашимовичахъ мягь-кем сагъламвал, кIвалахда мадни еке агалкьунар хьун кIанзава.