Лезги халкьдин камаллу «Къапуна авайди тIуруни къачуда» мисалдин гьахълувал, тайин са тухумдин кьвед-пуд несилдин уьмуьр веревирд авурла, тестикь жеда ва инсандин къилихрин, эдеблувилин, ада жемятдин арада, обществода кьунвай чкадин бинеда вуч аватIа ва гьакIни и бинедин дурумлувилин гъавурда акьада.
Вини СтIалрин хуьре Авчиеврин тухум чIехибурукай, жемятди гьуьрмет ийизвайбурукай я. Хуьруьн-кIвалин къайгъуйра хьайи инсанар, чилел зегьмет чIугур лежберар, жуьреба-жуьре пешейрин иесияр, алимар и тухумда виликдайни хьана, гилани ава. И кар чаз къенин макъалада са мисалдалди къалуриз кIанзава.
1935-йисуз лежбер хзанда дидедиз хьайи Авчиев Агъакерим алай вахтунда хуьре гьуьрмет авай инсанрикай сад я. Ада хейлин йисара райондин рекьерин участокда завхозвиле, Кьасумхуьруьн консервиярдай заводда бригадирвиле, технологвиле кIвалахна.
Агъакерима вичин уьмуьрдин юлдаш, саки 40 йисуз производствода гьакъисагъвилелди зегьмет чIугур Гьабибатахъ галаз 7 аял хана, уьмуьрдин шегьредал акъудна. Абуру алай вахтунда жуьреба-жуьре пешейрин иесияр яз кIвалахзава.
И макъаладиз кьил яз ганвай халкьдин мисалдин гьахълувал къалурун патал чаз Агъакерим ва Гьабибат Авчиеврин гада Омаракай ва адан хзандикай куьрелди суьгьбет ийиз кIанзава.
Омар Агъакеримович 1959-йисуз дидедиз хьана. Ада 1977-йисуз Кьасумхуьруьн 1-нумрадин юкьван школа, МГУ-дин экономикадин факультет акьалтIарна. Жегьил пешекар направленидалди къе вичикай къецепатан уьлкве хьанвай Украинадиз рекье туна. О. Авчиев ина 50 агъзур касдив агакьна инсанри кIвалахзавай шахтарин управленидин кьилин бухгалтервиле тайинарна. Гуьгъуьнилай вичихъ хъсан чирвилер авай лезги хци Торез шегьерда шахтадин директорвиле, вичик 18 шахта акатзавай шахтарин управленидин генеральный директорвиле кIвалахна. Эхиримжи йисара Омар Агъакеримовича шахтар эцигунин рекьяй директор яз зегьмет чIугвазва.
Омар Агъакеримовичахъ кьве велед ава: гада Тимур ва руш Ира. Абуруни Авчиеврин тухумдин тIвар виниз акъудзава. ИкI, Тимура Луганская областдин Краснодон шегьердин Советрин Союздин Игит Олег Кошевоян тIварунихъ галай государстводин университетдин юридический факультет Яру диплом къачуналди акьалтIарна. Алай вахтунда Т. Авчиева Краснодон шегьерда прокурорвиле кIвалахзава.
Ира тухумдал, диде-бубадал атанвай, хъсан низам, ахлакь авай, лезги ягь-намус гвай руш я. Ада Луганскдин государстводин университет Яру диплом къачуналди куьтягьна. Алай вахтунда Ира Омаровна и университетда аспирант я. Адахъ илимдин рекье виниз тир дережайриз хкаж жедай къаст ава. Адан гъиле илимдин кIвалахни ава.
Лугьуз кIанзава хьи, уьмуьрда гьи кар гъиле кьуртIани, агалкьун вич-вичелай арадал къведайди туш. Гьар са касди уьмуьрда вичин рехъ хкязавайди я. А рехъни, мисалда лугьузвайвал, физвайда атIуда. Са карда агалкьунар къазанмишун патал рикIе кIеви къаст, тайин мурадар аваз хьун ва, гьа къастунал кIеви хьана, дурумлудаказ зегьметни чIугун герек я. ИкI хьайила, зурба нетижаярни къазанмишиз жеда. И макъалада чпикай куьрелди суьгьбет авур Авчиеврин тухумдин векилривай хьиз.