«... Тама зурба мегъуьн тар гьалтда. Ам зурбади хьун адалай вичелай ваъ, ам экъечIнавай чилелай-накьвадилай аслу я. Эгер а тар руг, къван квай чкада экъечIнавайтIа, акьван зурбади жедачир».
Х. Абавян
Гьакъикъатдани, инсанарни чIехи дережайриз хкаж хьун, абуру илимда, спортда ва маса рекьера чIехи кукIушар муьтIуьгъарун абур хайи ерийрилай, чилелай гзаф аслу я. Лезгистандин баркаван чилини баркаллу гзаф рухваярни рушар гана, абуру чпин гъвечIи ватандин, халкьдин тIвар яргъарани машгьурна. Ихьтин рухвайрикай яз чавай кудодай Россиядин чемпионар, спортдин международный классдин мастерар, Россиядин хкянавай командадин членар тир стхаяр Ислам ва Муса Рамазановрин тIварар кьаз жеда. Лагьана кIанда хьи, кьве стхани гьакI кикбоксингдай, къайдаяр авачир кукIунрай, тайский боксдайни Россиядин ва дуьньядин чемпионатрин призерар я.
Мад са кар къейд ийиз кIанзава: Ислам ва Муса Рамазановрин чIехи стха рагьметлу Магьмудни кьуршахар кьунай машгьур спортсмен ва тренер тир.
Алай йисан мартдин вацра «Сулейман-Стальский район» муниципальный тешкилатдин Кьил Имам Музамудинович Яралиева кудодай Россиядин чемпион хьана хуьруьз хтанвай Ислам Рамазанов кьабулай гуьруьшдал Эминхуьре стхаяр Рамазановрин тIварунихъ галай ДЮСШ ачухдай меслятдал атанай.
Ингье, алатай гьафтеда Эминхуьре азаддиз къуршахар кьунал бинеламиш хьанвай ДЮСШ ачухуниз талукьарнавай шадвилин мярекат кьиле фена.
Тайинарнавай вахт жедалди са шумуд сят амаз Етим Эминан памятникдин вилик квай майдандал инсанар кIватI хьана, анал язавай музыка кьуд патаз чкIизва.
Махачкъаладай, Сургутдай, Дербентдай, республикадин гзаф районрай атанвай мугьманрин арада чIехи дережайрин руководителар, машгьур ксар, тIвар-ван авай спортсменар авай.
Тайинарнавай вахт хьайила, шадвилин мярекат башламишна. Тебрикдин сифте гафар лугьуналди, ам Кьасумхуьруьн телевиденидин руководитель Я. Ярагьмедова ачухна ва кьиле тухвана.
Сифте гаф гана рахай РУО-дин начальникдин заместитель Къ. Аминова жемятдиз райондин руководстводин патай хуьре стхаяр тир Рамазановрин тIварунихъ галай ДЮСШ ачухун мубаракна, ида неинки Эминхуьре, гьакI районда спорт вилик тухуниз, жегьилар чIуру кIвалахривай къерех авуниз куьмек гудайдакай лагьана.
Отставкада авай полковник М. Сефербегов вичин рахунра Рамазановрин тухумдин баркаллу крарал, инсанвилел, Исламани Мусади спортда къазанмишнавай чIехи агалкьунрал гегьеншдиз акъвазна, и карда абурухъ мадни чIехи агалкьунар хьана кIанзавайди лагьана.
- Къе хуьре чIехи сувар я, - лагьана «село Эминхюр» МО-дин кьил Р. Рамазанова. – Хуьре цIийи ДЮСШ ачухуник чи кьегьал хва Имам Музамудинович Яралиеван еке пай ква. Вучиз лагьайтIа, адаз хуьруьн жаван пагьливанри республиканский турниррани чемпионатра чIехи агалкьунар къазанмишзавайди, хуьряй тIвар-ван авай спортсменар акъатзавайди хъсандиз чизва. ДЮСШ ахъаюник чIехи пай кутунай эминхуьруьнвийрин патай чна адаз чухсагъул лугьузва. Зун инанмиш я, чи спортсменри чпиз авунвай чIехи ихтибар кардалди кьилизни акъудда – спортда мадни чIехи агалкьунар къазанмишда.
Мадни, баркаллу кIвалах гъиле кьунай стхаяр-чемпионар тир Ислам ва Муса Рамазановризни чухсагъул.
Шадвилин мярекатдал хуш келимаяр гваз «Эминхюрский» МУП-дин директор Н. Ягьяев, Эминхуьруьн патай райондин Собранидин депутат М. Мегьамедов, райондин дяведин ва зегьметдин ветеранрин Советдин председатель М. Гьасанов, хуьруьн юкьван школадин директор Р. Османов, райондин имам Рамазан гьажи, Къазахстан Республикадин лайихлу тренер М. Гьасанбегов, цIийиз ачухнавай ДЮСШ-дин директор А. Мегьамедкеримов, Тагьирхуьруьн къазмайрин ДЮСШ-дин директор, международный категориядин судья М. Гъаниев ва маса юлдашар рахана.
Чна винидихъ лагьайвал, хуьряй хейлин хъсан спортсменар акъатнава. И мярекатдал хуьруьн муниципальный тешкилатдин патай спортда агалкьунар къазанмишунай ва хуьре спортдин кIвалах вилик тухунай кьуршахар кьунай Дагъустан Республикадин чемпионар ва призерар тир Д. Асахановаз, И. Мегьамедоваз, Э. Къарахановаз, И. Алимурадоваз, Р. Мурадагъаеваз, Р. Мегьамедоваз къиметлу пишкешар, жаван спортсменар тир З. Асахановаз, А. Бабаеваз, Э. Жигероваз, И. Хазрановаз ва И. Абдулагъаеваз Гьуьрметдин грамотаяр гана.
Россиядин чемпионар тир Ислам ва Муса Рамазановрин дах Ямудин халуди и мярекатдиз спонсорвал авурбуруз, ана иштиракайбуруз рикIин сидкьидай чухсагъул лагьана.
Шадвилин мярекат «Звезда» группади ва гьевескарри чIехи концерт гуналди куьтягь хьана.
- Гьелбетда, хуьре спортшкола ачухун – им чна къачунвай сифте кам я, - лагьана чаз Ислам Рамазанова. – Аниз жезмай кьван гзаф жаванар желбда, вучиз лагьайтIа, спорт сагъламвал я. Чун абуруз шартIар яратмишизни чалишмиш жеда. Мадни, чахъ хуьре спортдин турнирар, чемпионатар тухудай фикирни ава.
Куь къени ниятар кьилиз акъатрай!