Вирироссиядин агьалийрин перепись кьиле тухунихъ галаз алакъалу яз РД-дин Президентдин эвер гуна кхьенва: «... Перепись - им агьалийрин кьадардиз, абур уьлкведин жуьреба-жуьре территорийра яшамиш хьуниз, милли ва чIаларин составдиз, савадлувилин дережадиз талукь делилрин асул чешме я. Переписди вири дережайрин бюджетар арадал гъун патал, здравоохранение, образование вилик тухунин, пенсийралди таъминарунин, агьалияр кар-кеспидик кутунин программаяр туькIуьрун патал лазим тир делилар къачудай мумкинвал гуда...».
Агьалийрин кьадар гьисаб кьунин кIвалах Вини СтIалрин хуьрени хъсан тешкиллувал аваз кьиле физва. И жавабдар кар вичиз хуьруьнвияр хъсан чизвай ва тежриба авай Баламирзоева Малинадини Рамазанов Асима кьиле тухузва. Абур пакаман сятдин 8 далай нянин сятдин 8 далди къуьне махсус сумкаяр аваз хуьре кIвалба-кIвал къекъвез аквада. Икьван чIавалди 60 процентдилай виниз агьалийривай делилар кхьенва. И кар давам жезва.