Малум тирвал, алай йисан октябрдин вацран 14-25-йикъара чи уьлкведа агьалийрин перепись кьиле фида. Вичихъ государстводин еке метлеб авай и важиблу мярекат башламиш жедай йикъан вилик чун агьалийрин Вирироссиядин перепись кьиле тухунин рекьяй чи районда авай Дагестанстатдин векил Къухмазов Рамазан Зейдуллагьовичахъ галаз гуьруьшмиш хьана ва адавай и мярекат кьиле фидай гьалдикай куьрелди лугьун тIалабна.
Ада вичин суьгьбетда къейд авурвал, чи районда агьалийрин перепись кьиле тухунал переписной 8 отделдин заведующияр, 33 кас инструкторар, 16 кас стационарный переписчикар ва 143 кас гьисаб кьун кьиле тухузвайбур (счетчикар) машгъул жеда. Абурал виликамаз чкайрал герек тир вири материалар агакьарна, инструктажар кьиле тухвана. 13-октябрдиз вири чкайра гьазур хьанвай гьал ахтармиш хъувуна. Счетчикрив (гьисаб кьазвайбурув) чпин паспортар ва талукь удостоверенияр, гьар са участокдал гьалтзавай (450-500 кас) агьалийрин списокар ва картаяр жеда.
Перепись кьиле тухунин къайда ихьтинди я:
Счетчикар чпин сергьятра авай инсанар яшамиш жезвай гьар са кIвализ фида. КIвалин иесидивай гьамиша кIвале яшамиш жезвайбурун кьадар хабар кьада. Абур счетчикди вичив гвай листера (СI-да) кхьида.
ЛI- гьар садаз са чар (лист) ацIурда (кьве патани), ана 25 суал жеда. Жавабар хашар (крестикар) эцигуналди гуда.
П- формадин лист гьар са кIвализ са лист ацIурда. Ана яшайишдин шартIариз талукь суалар жеда.
В – формадин листина (эгер ихьтин ксар аваз хьайитIа) чи уьлкведилай къецепатай хтанвай вахтуналди яшамиш жезвайбур аваз хьайитIа, абурун гьакъиндай делилар кхьида.
Графикдин бинедаллаз счетчикдилай гьар юкъуз шумуд кIвалин гьакъиндай делилар кIватIиз алакьзаватIа инструкторди адахъ галаз санал фена ахтармишда ва 25-октябрдалди переписдин кIвалах акьалтIарда.
Переписдихъ галаз алакъалу тир вири кIвалахар 29-октябрдиз куьтягьун ва республикадиз агакьарун лазим я. Переписдин кIвалахрихъ галаз алакъалу вири месэлайрай райцентрдал алай пуд мертебадин административный дараматда виликан ЗАГС авай чкадиз къвез жеда.
И важиблу мярекат хъсан тешкиллувал кьиле тухун патал гьар са районэгьлиди вичин ватандашвилин буржи кьиле тухун ва и кардиз жедай куьмек гун лазим я.
Агьалийрин Вирироссиядин перепись башламиш хьанва.
