Алай йисан 10-октябрдиз уьлкведа, республикада хьиз, чи райондани муниципальный сечкияр кьиле фена. КьетIендаказ къейд ийиз кIанзава, райондин вири муниципальный тешкилатра сечкияр законри истемишзавайвал, сечкичийрин хъсан иштираквал аваз кьиле фена.
Районда авай муниципальный 16 тешкилатдикай 10-октябрдиз 15 тешкилатда анрин кьилер ва хуьрерин Собранийрин депутатар хкяна.
Сечкийрин юкъуз гьич са тешкилатдани, участковый комиссийрани къайдаяр чIурай, чIуру кIвалахриз рехъ гайи дуьшуьшар хьанач. Ида хуьрерин агьалияр, сечкичияр важиблу и кампаниядив гъавурда аваз эгечIайдан гьакъиндай шагьидвал ийизва. ГьикI лагьайтIа, абуру хкягъай муниципальный тешкилатрин кьилерилай, Собранийрин депутатрилай хуьрерин социальный, аваданламишунин месэлаяр, агьалийрин яшайиш гзаф аслу я эхир.
Сечкияр тешкиллувал ва сечкичийрин хъсан акитиввал аваз, гьакIни законрихъ галаз кьадайвал кьиле фейидан гьакъиндай агъадихъ гъизвай рекъемрини шагьидвал ийизва. Райондин сергьятдин комиссиядай чаз гайи протоколдай малум жезвайвал, муниципальный тешкилатдин сергьятда 42 участковый комиссияр авай. Протокол гьазурай протоколдин бинедаллаз сесер гунин участковый комиссийрин протоколрин кьадар 41 я.
Сечкияр тухун дуьз туширбур яз гьисабай участковый комиссияр авач.
Санлай къачурла, районда тухвай сечкийра сечкичийрин 73,44 процентди иштиракна, сечкияр кьиле фейиди яз гьисабна. Сесер куьтягь хьайила списокра гьатай сечкичийрин хьиз, сечкидин участковый комиссияди къачур бюллетенрин кьадарни 32532 я. Сечкийрин юкъуз сечкичийриз участокра 23916 бюллетень гана.
Махсус чара авунвай дараматрилай къецяй сес гайи ва санлай масаниз тухудай сечкийрин ящикрай жагъай, квахьай ва гьисаба кьун тавур бюллетенар авач.