Малум тирвал, алай йисан 10-октябрдиз «Дербент шегьер» шегьердин округдин Кьил хкядай сечкияр кьиле фена. Ана амай кандидатрин арада еке тафават аваз – 96,63 процент сесер къачуналди – Имам Музамудинович Яралиева гъалибвал къачуна.
И. М. Яралиев 1956-йисан 2-январдиз Дагъустан АССР-дин Сулейман-Стальский райондин Вини СтIалрин хуьре дидедиз хьана. 1974-йисуз Кьасумхуьруьн 1-нумрадин юкьван школа акьалтIарайдалай гуьгъуьниз ада «Калининский» совхозда рабочийвиле кIвалахна. 1975-йисуз Дагъустандин государственный университетдин юридический факультетдик кIелиз экечIна ва 1980-йисуз анаг яру диплом къачуналди акьалтIарна. 1981-йисалай 2006-йисалди къайдаяр хуьдай органра кIвалахна, стажер-помощниквилелай Дагъустан Республикадин прокурорвилел кьван хкаж хьана.
И. М. Яралиева 1981-йисалай 1984-йисалди Ботлих районда стажер-помощник, гуьгъуьнилай прокурордин помощниквиле, Махачкъала шегьердин Ленинский райондин прокуратурада следователвиле, гуьгъуьнилай республикадин прокуратурадин следственный управленидин прокурорвиле, 1986-йисалай 1992-йисалди Дербент райондин прокурорвиле, 1992-йисалай 1995-йисалди республикадин прокурордин сад лагьай заместителвиле кIвалахна.
1995-йисан 12-октябрдиз акъатай Россиядин Федерациядин Генеральный прокурордин приказдалди И. М. Яралиев Дагъустан Республикадин прокурорвиле тайинарна.
И. М. Яралиева къенин девирдин Дагъустанда конституциядин истемишунар мягькемарунин, къайдаяр хуьдай органар реформировать хъувунин карда активвилелди иштиракна.
Имам Музамудинович Россиядин Федерациядин прокуратурадин гьуьрметлу работник (1994-йис), РФ-дин лайихлу юрист (1997-йис), кьвед лагьай классдин юстициядин государственный советник я. Адаз «Гьуьрметдин орден» (1999-йис), тIвар кхьенвай яракь (1999-йис), А. Ф. Конидин тIварунихъ галай къизилдин медаль ганва.
И. М. Яралиев Дагъустандин тIвар-ван авай общественный ва политический деятель я. Ам ДР-дин Халкьдин Собранидин депутатвиле (1995-1999-йисар), ДР-дин Государственный Советдин членвиле (1998-2002-йисар) хкяна.
2000-йисалай И. М. Яралиев игитвилин «Шарвили» эпосдин суварар гьазурунин ва тухунин тешкиллувилин комитетдин председатель, «Шарвили» эпосдин текстар тамамдаказ урус ва лезги чIаларалди акъудунин инициатор я.
2007-йисалай 2010-йисан майдалди И. М. Яралиева «Сулейман-Стальский район» муниципальный тешкилатдин Кьил яз кIвалахна.