Майдин варз ва июндин эвел кьил – дагълара йисакай виридалайни хъсан вахт я! Дугунра пIини-хатрут чразва, яйлахра бул векь-цуьк жезва, куьнуьйрани - майдин атирлу вирт.
Пиримаз йисан и вахт гзаф кIанда. Гьар йисуз, отпуска къачудайла, ада майдиз ва я, гьич тахьайтIа, июндин цIувадриз вичиз отпуск гун тIалабда.
Гена, масадбуру хьиз, ада вичиз курортриз путевкани тIалабдач, ам хайи дагъларал кьил чIугваз хкведа. «- Курортдиз физ хьайитIа, пабни къведа. Мад тамуз кIарасар тухуч хьи», - лугьудай къуллугъ яргъал тир Россияда ийизвай кьегьалди.
Адалайни гъейри, са арифдарди лагьаналдай: «Низ виш йисуз яшамиш жез кIанзаватIа, гатуз дагълара ял ягъа». Вучиз Пиримаз, яшайишни хъсан яз хьайила, бул пулни къвез хьайила, виш йисуз яшамиш жез кIандач?
Са гафуналди, гьар йисан и чIавуз ам отпуск къачуна, жуван ерийриз хкведай, ял ядай. Отпускадин йикъар куьтягь хьайила, Пирим «кефсуз жедай».
И йисузни гьа икI хьанай.
Амма...
Иномаркада аваз хтай Пирим дустуни – духтур Мирима къаршиламишна. Хваш-беш авуна, главврачдин кабинетда дустари чеб-чпел расалмиш хьунин лишан яз са румкаярни яна.
- Зун, - лагьана Пирима, - дуст, ви патав, гьамиша хьиз, ацIай гъиливди хтанва. Им ваз къачудай машиндиз зи патай жедай са куьмек, - лагьана, вад вишерин пачка вугана Миримав. – Имни коробка армянский «шуьрбетар». Чун мукьвара гьалт хъийида.
Гъилер янай абуру.
- Ахлад, ял ягъа, кеф чIугу. Зун ви далудихъ галамай кьван архайин хьухь, - лагьана кьилин духтурди.
ТIебиатди яратмишнавай гуьзел чкайра, аял вахтара кIелер-хпер гваз къекъвей кIвачин рекьера, мулкуна авай кьван саки вири къайи булахрал ялар яна чи Пирима. Отпускани ингье гьа икI куьтягь хьана. Пул, лагьайтIа, кIамай кьванди гумай.
- Ваъ, икI жедач, - фикирна ада, - гила отпуск яргъи авуна кIанда.
- Ви отпуск куьтягь хьаначни? Вун мус хъфида? – лагьайбуруз ада, тIуб цавуз хкажна, хур экъисна, жаваб гудай: « - Мирим-Шагь дагъ я зи, далу я. Ам галамай кьван заз вуч ава? Ял я хъийида».
Июнни акъатна. КIвалин дерди-балаяр вири туькIуьрайдалай кьулухъ ада фикирна: «Вахтар я. Гила Миримавай вили чарни къачуна (документ кIандачни кIвалахал), хъфейтIа хъсан я». Пакад юкъуз ам райондиз фена.
РакIарихъ галай инсанризни яб тагана, главврачдин гьич ракни гатун тавуна, Пирим Мириман кабинетдиз гьахьна. Ана касни авачир. «- Яъ, им авач хьи! Къайгъу туш, хкведа ам. Са ял акъадарин садра, - фикирна, ам кIвачер яргъи авуна, дивандал къулайдиз ацукьна. – Са хъуьруьн хьуй, за адаз са кар кьада», - лагьана, Мирим ацукьдай чкадин кIаник, столдин, вичин гъилик квай сумкадай акъудна, са коньяк эцигна.
Рак ахъайна, кабинетдиз лацу халат алай, вижевай мешребар алай са дишегьли гьахьна, Мириман чкадал ацукьна. Ахпа Пиримахъ элкъвена, адавай урус чIалалди хабар кьуна:
- Лагь, ваз вуч кIанзаватIа?
- Са затIни.
- Тахьайла вун иниз вучиз атанва?
- Ихтияр авачни? Зун Мириман кьилив атанвайди я.
- Ам ина амач. Ам масаниз кIвалахал рекье тунва.
Пирим, туп хьиз, цавуз гадар хьана.
- Вуч?! – гьарай акъатна Пиримай. (И гьарайдин ванцел медсестраяр кIватI хьана иниз) – Вуж я ам акъудайди? Мегер ам акъудиз жедайди авани?!
И арада къалабулух акатай цIийи главврачдин туфлидин тик дабан галукьна, коньякдин шуьше столдин ракьун кикехъ галукьна ва, ван авуна, кабинетдин юкьвал авахьна.
- А – гьан, - рахана цIийиди, - а ви Мирим ингье куь кIвалахдилай алуднатIа...
Пириман чиниз иви хъчена. Адаз лугьудай гаф амукьнач. Ам, кицIери калтугай жанавур хьиз, кабинетдай къецел цIуьтхуьнна.
Кьилин духтурдин кабинетда авайбуруз бул хъуьруьнар хьана. Лацу халатар алайбуруз виридаз Пириманни Мириман арада хьайи «коррупция» лентина гьатнавайдакай хабар авай...
М. Мегьамедов, лезги писателрин Союздин член
