Малум тирвал, чи уьлкведа гьар йисуз 1-октябрь яшлубурун Югъ яз къейдзава. Ам шад гьалара къейд авун чи райондани хъсан адет хьанва.
И юкъуз чи районда фадлай кардик квай агьалийриз яшайишдин жигьетдай куьмек гудай сергьятдин центрдин ГУ-дин работникри кIвалах-завай виликан нисиярдай заводдин дараматдин патав ветеранри ял ягъун патал туькIуьрнавай махсус залда аниз теклифнавай яшлубуруз гьар жуьредин няметар алай суварин столар гьазурнавай. Нисинин вахт жедайла агьил ксар, сада-садаз яшлубурун Югъ мубарак ийиз, суварин столрихъ ацукьна.
Сифте абурун вилик экъечIна анал куьруь гаф гваз рахай «Сулейман-Стальский район» муниципальный райондин администрациядин Кьилин заместитель С. М. Велиева чи уьлкведин аслутуширвал хуьн патал дяведин женгера хьайи, фронтдин далу пата зегьмет чIугур, чи райондин экономика вилик тухун патал адан гьар хилера дурумлувилелди кIвалах авур вири ветеранриз райондин руководстводин ва гьакIни вичин патай яшлубурун Югъ рикIин сидкьидай мубарак авуна, абурухъ яргъал уьмуьрар, балайрикай ва хтулрикай рикIин архайинвал, дуьньяда ислягьвал, хзанрани бахт, берекат хьана кIанзавайди лагьана.
Гуьгъуьнлай анал ДР-дин зегьметдин ва социальный жигьетдай вилик финин министр И. И. Эфендиеван ва гьакIни чпин тIварцIихъай тебрикдин хуш келимаяр гваз ТЦСОН ГУ-дин руководитель А. С. Бабаев, агьалийриз социальный жигьетдай къуллугъ ийидай райондин управленидин начальник Ж. Б. Бремов, дяведин активный иштиракчи ва педагогвилин зегьметдин ветеран Гь. Къ. Къазимегьамедов, зегьметдин ветеранар тир А. Идрисов, Р. Юсуфов ва маса юлдашар рахана.
Шадвилин межлисдилай гуьгъуьниз анал агъсакъалрив ДР-дин министр Исмаил Ибрагьимович Эфендиеван патай ганвай къиметлу савкьватар шад гьалара вахкана. Чпив улакьар гвачирбур эхирдай улакьра аваз кIвалеризни хутахна.
И югъ суварин мярекатда иштирак авурбурун рикIел яргъалди аламукьдайди хьана.
