7-сентябрдиз «Сулейман-Стальский район» муниципальный райондин администрациядин нубатдин заседание кьиле фена. Адан кIвалахда райондин администрациядин управленийрин ва отделрин начальникри, хуьрерин поселенийрин кьилери, организацийрин ва карханайрин руководителри, теклифнавай маса юлдашри иштиракна.
Заседание райондин администрациядин кьилин везифаяр тамамарзавайди тир Мусаиб Гьажибалаевич Агьмедова ачухна ва кьиле тухвана.
Анал агъадихъ галай месэлайриз килигна:
1. Вири дережайрин бюджетриз налогар ва налогрилай къецяй тир къазанжияр атунин гьакъиндай.
2. Жуьреба-жуьре месэлаяр
Заседанидал алай сад лагьай месэладай райондин администрациядин кьилин заместитель Рамиз Абдулашимович Муталибова доклад авуна. Ада къейд авурвал, райондин бюджетдин хсуси къазанжийрин тапшуругъар депутатрин Собранидин решенидихъ галаз кьабулзава, гьа са вахтунда ам Дагъустан Республикадин финансрин министерстводихъ галаз меслят ийизва.
2010-йисуз муниципальный райондин хсуси къазанжияр атунин къазанжийрин паюни 48238 агъзур манат, гьа гьисабдай яз налогрилай къецяй 6727 агъзур манат къалурнава. Санлай къачурла, 2009-йисан и девирдив гекъигайла райондин бюджетдиз къазанжияр атун 21 процентдин артух хьанва. 15-сентябрдилай чилин ва физический ксарин эминнидилай налогар кIватIдай вахт алукьнава. Умудлу я, и рекьерайни тапшуругъар кьилиз акъудда.
Заседанидал гьялзавай месэладай районрин уртах налоговый инспекциядин руководителдин заместитель А. Асланова, Кьасумхуьруьн, Испикрин, ЦIийи Макьарин, Цмуррин хуьрерин поселенийрин кьилер тир Б. Бремова, Р. Магьмудова, А. Къазимегьамедова, Р. Алибеговади чпин фикирар лагьана.
И месэладай анал талукь къарар кьабулна.
Заседанидал райондин пожарный надзордин отделенидин начальник Р. Рамазанова муниципальный сечкияр кьиле тухудай идарайра цIаяр кьунриз акси серенжемар кьабулнавай гьалдин гьакъиндай информацияни авуна.