20-сентябрдиз райадминистрациядин заседанийрин залда чи баркаллу районэгьли генерал-майор Эминов Тагьир Хаирович ва ФЛНКА-дин президент, Москвада урус чIалалди акъудзавай «Лезгинские известия» аслу тушир газетдин редактор Керимов Ариф Пашаевич райондин активдихъ галаз гуьруьшмиш хьуниз талукьарнавай мярекат хьана. Ам багьа мугьманар СтIал Сулейманан райондин чилел тебрик авуналди ва абурун тIварцIихъ хуш келимаяр лугьуналди «Сулейман-Стальский район» муниципальный райондин Кьилин везифаяр тамамарзавайди тир Мегьамедханов Штибег Гьажимегьамедовича ачухна ва кьиле тухвана. Ада залда кIватI хьанвайбур атанвай мугьманрин куьруь биографийрихъ галаз танишарна, абурун лайихлувилерикай лагьана.
Ада къейд авурвал, Эминов Тагьир Хаирович 1951-йисуз Агъа Арагъа дидедиз хьана. 1969-йисуз Кьасумхуьруьн юкьван школа куьтягьна ва гьа и йисуз СССР-дин МВД-дин Харьковдин военный училищедик кIелиз экечIна. Ам акьалтIарай 1973-йисалай вичин офицервилин къуллугъ башламишна.
1982-йисуз СССР-дин оборонадин Министерстводин далу патан (тылдин) ва автотранспортдин Ленинграддин военный академиядин автомобильный факультет агалкьунралди акьалтIарна ва ам Московский военный округдиз рекье туна. 1994-йисуз юриствилин диплом къачуналди В. И. Ленинан тIварунихъ галай военно-политический академиядин юридический факультет, 1998-йисузни РФ-дин Яракьлу Къуватрин Генеральный штабдин Военный академиядин патав гвай Высший академический курсар акьалтIарна. Россиядин МВД-дин къенепатан кьушунра взводдин командирвилелай техникадин ва яракьрин рекьяй Россиядин МВД-дин къенепатан кьушунрин Московский округдин кьушунрин командующийдин заместителвилин къуллугъдал кьван хкаж хьана, гьакIни техникадин ва яракьрин рекьяй и военный округдин начальниквилин везифаяр кьиле тухуз хьана.
1998-йисалай Россиядин МВД-дин къенепатан кьушунрин Кьилин командованида кIвалахна. Т. Х. Эминова Нагорный Карабахда, Чечняда, Дагъустанда ва гьакI маса чкайра кьиле фейи яракьлу акьунрани иштиракна.
Алай вахтунда ада Россиядин МВД-дин къенепатан кьушунрин автобронетанковый управленидин начальник яз кIвалахзава.
- Адаз 1997-йисуз генерал-майорвилин тIвар гана. Ам военный техникадин рекьяй илимрин кандидат, профессор я. Гзаф йисарин намуслу зегьметдай адаз «орден Мужества», «За военные заслуги» орденар ва 8 медаль ганва. Ам чи халкьдин дамах, чи кьилин винизвал я, - лагьана ада.
Гуьгъуьнлай Ш. Гь. Мегьамедханов эхиримжи 3 йисан къене район экономикадин, яшайишдинни социальный жигьетдай вилик тухунин карда къазанмишнавай агалкьунрал, и жигьетдай гъиле авай кIвалахрал ва гьакIни вилик кумай месэлайрал акъвазна. Кьилди къачуртIа, ада къейд авурвал, кIвалах дуьз тешкилунин, чIехи инвестицияр желб авунин нетижада эхиримжи 3 йисан къене райондин бюджетдиз къвезвай хсуси доходрин кьадар 3 сеферда, бюджетдин умуми кьадарни 2 сеферда артух хьана. «Сардархуьр-ДаркIушкъазмаяр» водовод кардик кутуни райондин агьалийрин саки 85 процент хъвадай, 2500 гектар дигидай целди, 3 агъзур касдилай виниз инсанар кIвалахдай чкайралди таъминардай мумкинвал жеда.
Инвесторрин куьмекралди гележегда промышленностдин карханаяр кардик кутада, цIийи уьзуьмлухар, багълар кутун давамарда. Райондин промышленностдин чIехи карханайрикай сад тир «Завод минеральных вод «Рычал-су» ОАО-дин хъвадай ятар цадай алава линия кардик кутун патал 105 миллион манатдин инвестицияр кардик кутада. «Кпул ятар» санаториядин бинедаллаз чи районэгьли тир карчи Абасов Разима вичин 450 миллион манатдихъ агакьна инвестицийрин гьисабдай алай аямдин лечебно-оздоровительный центр эцигда, 6 гектарда ял ядай парк кутада. Госдумадин депутат, карчи Нуьдуьрбегов Асанбубади 250-300 миллион манатдин инвестицияр чара авуналди спортивно-оздоровительный центр кардик кутун фикирдиз къачунва.
Гуьгъуьнлай анал чпи тухузвай кIвалахрикай, жуьреба-жуьре месэлайрай чи уьлкведа авай гьалдикай куьруь информацияр гваз генерал-майор Т. Х. Эминов ва А. П. Керимов рахана. Абуру залда ацукьнавайбурун патай атай са жерге суалризни жавабар вахкана.
Эхирдай анал гуьруьшмиш жез атанвай чи баркаллу ватанэгьлийрин гьакъиндай хуш келимаяр, чпин фикирар гваз С- Стальский РОВД-дин начальник Э. М. Эседуллаев, «ГО-дин ва ЧС-дин центр» ГУ-дин райондин отделдин начальник М. М. Закариев, самбодай мастеррин арада дуьньядин чемпион, тренер Рамазан Къурбанов ва маса юлдашар рахана.
Гуьруьшмишвилин эхирдай Ш. Мегьамедханова райондин активдин ва гьакIни вичин патай багьа мугьманриз мад сеферда чухсагъулдин келимаяр лагьана.
