1926-йисуз Зизикрин хуьре дидедиз хьайи, 60 йисалай виниз газетдихъ галаз сих алакъа хуьзвай Дашдемир Адилован тIвар эдебиятдал рикI алайбуруз фадлай таниш я. Сифтедай хайи хуьре колхоздин клубдин зеведишвиле, гуьгъуьнлай 26 йисуз хуьруьн Культурадин кIвалин директорвиле кIвалах авур Д. Адилова 1957-йисалай эгечIна шиирар, фельетонар кхьизва. Ам лезги писателрин Союздин член я.
Мукьвара Кьасумхуьрел тешкилнавай «Куьредин ярар» культурадин центрдин компьютеррин базада Д. Адилован «Кузва зи рикI, ялав галаз...» тIвар алай ктаб чапдай акъатна. Ктаб «Лезгистандиз вил вегьейла...», «Ша, лезгияр!», «Ашкъидин чирагъ» паярикай ибарат я. 208-чиникай, 13 шартIунин печатдин листиникай ибарат тир ктабда 150-дав агакьна шиирар, «ХХ асирдин Гомер», «Зун кузва ялгъузвилин ялаври» поэмаяр гьатнава.
Агъсакъал шаирдин тематика жуьреба-жуьре я: бахшшиирар (тIвар-ван авай инсанриз бахшнавай шиирар), Ватандикай, гуьзел тIебиатдикай, муьгьуьббатдикай... кхьенвай шиирар ктабда гзаф ава.
Д. Адилован ктабда гьатнавай шиирар, поэмаяр мана-метлебдиз деринбур, гьар са касдин рикIиз таъсирдайбур хьанва. Умудлу я, кIелзавайбуру агъсакъал шаирдин ктаб хушвилелди кьабулда.
