Гьар са инсанди уьмуьрдин са кьадар рекьиз фейила, алатай йисар рикIел хкида, авур ва кьилиз акъудиз акакь тавур крар веревирд ийида. И жигьетдай вичин яшар 80-дахъ агакьзавай Кьасумхуьрелай тир зегьметдин ветеран Мазанов Музамудин Жарулаевичазни ава вуч рикIел хкидатIа.
1932-йисуз лежбер хзанда дидедиз хьайи адан аял ва жегьил йисар дяведин ва адалай гуьгъуьнин акьалтIай четин йисарал гьалтна.
Ватандин ЧIехи дяве башламиш хьайи 1941-йисуз кефсузвиликди буба регьметдиз фейила, хзан четинвиле гьатайла, ам вичин диде Саиматахъ галаз Асалдхуьруьз чIехи дидедин патав хъфена.
- Дяведин йисар гзаф четинбур тиртIани,- рикIел хкизва зегьметдин ветеранди,- гуьне пата Асалдхуьр, Испикар фу авай хуьрер тир. Анриз маса патал хуьрерай инсанар гам- гибедихъ ва маса къиметлу шейэрихъ гъуьр, техил къачуз къведай. Гзаф йисара Асалдхуьруьн «Дагправда» колхоздин председателвал авур Зегьметдин Яру Пайдахдин ордендин сагьиб регьметлу Алимирзе халуди, винтовка къуьне аваз, хуьруьн жемятдив кIвалахиз туна ва абур къачагърикай, дизертиррикай хвена. Гьайиф хьи, куьз ятIани, ахьтин викIегь, хайи халкьдихъ рикI кайи инсанар чна къе рикIелай алудзава, ахьтинбурун тIварар эбеди авуна кIанда.
Кьасумхуьрел хтана са бубат кIвачи чил кьурдалай гуьгъуьниз буба кьилел аламачир 17 йисан яшда авай жегьил гадади са кеспидин иеси хьун кьетIна: ада 1949-1950-йисара райондин церин идарада шофердин куьмекчивиле кIвалахна.
1950-йисуз Музамудин, гзаф маса жегьилар хьиз, Баку шегьердиз фена. Ана ремесленный училищеда кIелна «нефтянник- бурильщиквилин» пешекарвал къачур ада, Советрин Армиядин жергейра къуллугъ авуна хтайдалай гуьгъуьниз, Бакудин нафтIадин мяденра бурильщик яз кIвалахна.
Хайи хуьруьз хтайдалай гуьгъуьниз ада 1958-1963-йисара Кьасумхуьруьн консервияр акъуддай заводда шофер яз пар чIугвадай автомашиндал кIвалахна.
Гуьгъуьнлай шофер яз ада 3 йисуз Кьасумхуьруьн райисполкомдин коммунальный отделда, 1966-1973-йисарани «Рычал-су» заводда намуслувилелди кIвалахна.
1973-йисалай, вич 1994-йисуз лайихлу пенсиядиз экъечIдалди, 1-классдин шофер Мазанов Музамудин Дербентдин электросетрин Кьасумхуьруьн участокда шофер яз хьана. Вири и йисара машиндин рулдихъ галаз, ДТП-яр авачиз, ам фейи кьван мензилдин, тухвай кьван парарин сан кьун четин я.
Вичел тапшурмишай гьар са кIвалах намуслувилелди кьилиз акъудай, вич юлдашрин арада дуьз тухуз чидай адахъ вичи кIвалах авур коллективра гьуьрмет авай. Адан зегьметдиз гьукуматди лайихлу къиметни ганва. Адаз гзаф йисарин намуслу зегьметдай 1966- йисуз «Зегьметдин ветеран», В.И.Ленинан 100 йисан юбилейдихъ галаз алакъалу яз акъуднавай медалар, Ватандин ЧIехи дяведа гъалиб хьунин 50, 60 ва 65 йисан юбилейрин медалар, соревнованидин гъалибчивилин ва маса значокар, Гьуьрметдин Грамотаяр ганва, чухсагъулар малумарнава.
ГъвечIи чIавалай зегьметдал рикI алаз вердиш хьанвай агъсакъалдиз кIвале кар- кеспидик квачиз гьакI ацукьна кьарай къведач. Ам гагь вичин лапагарни гваз вацIун кьере, гьагь сала- багъда аквада.
Мазанов Музамудин чIехи хзандин кьилни я. Гзаф йисара чи райондин центральный больницада медсестра яз кIвалах авур ва алай вахтунда пенсияда авай вичин уьмуьрдин юлдаш Нуриятахъ галаз санал абуру 6 аял чIехи авуна, уьмуьрдин шегьредал акъудна. Чпихъ хзанар хьанвай рушар патарал яшамиш жезватIани яшлу дидединни бубадин патав абурун хва Азиз гва.
Алай вахтунда чIехи дидедихъни бубадихъ 20 дав агакьна хтулар ва птулар ава. Абуру зегьметдин ветеранриз руьгьдин къуват, цIийи умудар гузва, абурун уьмуьр яргъи ийизва.