Кьасумхуьруьн ООО «Граф М» тIвар алай шумудни са жуьре хъвадай ятар акъудзавай цехдин продукциядин тариф са чи райондиз ваъ, вири Дагъустандиз, гьакIни Урусатдин гзаф маса шегьерризни чкIанва. И кар чаз цехдин вилик хъуьтIуьз, гатуз продукция къачуз нубат атунал вил алаз акъваззавай машинрин цIиргъедини субутарзава.
-Районда хъвадай ятар акъуддай цехар гзаф ава, куьн инал йикъаралди нубат кьаз вучиз акъваззава?- хабар кьуна за пар ядай нубат атунал вил алаз акъвазнавай машинрин иесийривай.
-Тухвай шейинилай хийир къачуна кIанда, вах, - жаваб гана са машиндин иесиди. - Чна и цехдин продукция туьквенриз, кьилдин ксариз мел-мехъердал ва маса хийир-шийиррал заказ авурбуруз тухузва. Кьвед-пуд юкъуз нубат кьаз акъвазайтIани, чун чна тухузвай продукция ише фидайдахъ инанмиш я. Чахъ и продукция къачудай муьштерияр гзаф ава. И цехдин хъсан еридин продукциядихъ вердиш хьанвайбуруз маса цехрин продукция кIанзавач.
1991-йисалай кардик квай винидихъ тIвар кьунвай цехдин продукциядин тариф гьич са рекламадивайни акьван виниз хкажиз жедачир, эгер и карханадин директор Исмаилов Мусина вичин цехди акъудзавай хъвадай ятарин ери вири патарихъай хъсанди хьун патал еке зегьмет чIугвазвачиртIа.
Цехди цIудралди са шумуд хуьруьн агьалияр кIвалахдалди таъминарзава. КIвалахзавай коллектив сезонриз килигна фад-фад дегиш жезватIани, 1994-йисалай бригадирвал, кассирвал ийизвай Гьажимирзоева Чрахалумалай, слесарь-электрик Мурадов Бедулагьалай, 8-10 йисуз гьа и цехда рабочивиле кIвалахзавай Гьабибова Сунахалумалай, Мирзоева Алладилай, Асулова Тевризалай, Исрафилова Каминаталай, Шабанова ФатIиматалай чешне къачузвай жегьил рушарини гадайри чпел тапшурмишнавай везифаяр жавабдарвилелди кьилиз акъудиз вердиш жезва.
Цехдин патавай фидайла, анай къвезвай шад, гагь манийрин, гагьни хъуьруьнрин ванери, кIвалахзавайбур чпи ана кIвалах авунал, цехдин руководителди чпин зегьметдиз гузвай гьакъидал рази тирдан гьакъиндай шагьидвал ийизва.