Кьасумхуьр. 2010-йисан 1-сентябрь, пакаман сятдин муьжуьд, Кьасумхуьруьн 1-нумрадин юкьван школа. И югъ аялрин, абурун диде-бубайрин, гьакI муаллимрин рикIелни яргъалди аламукьдайди авун патал кьетIен шад гьалара кьиле тухун ина фадлай хъсан адет хьанва.
ЦIийи кIелунин йис башламиш хьуниз-Чирвилерин йикъаз талукьарнавай шадвилин линейка, вирибуруз и гуьзел сувар тебрик авуналди, школадин тешкилатчи Кьасумова Айишата ачухна ва ада сад лагьай классдиз физ гьазур хьанвай аялриз эвер гана.
КIвачерик звер, сивел хъвер, гъиле еке цуькверин кIунчIар аваз, дамахарнавай бицIекар чпин муаллимарни галаз линейкадал экъечIна. Гуьгъуьнлай РФ-дин пайдах хкажун патал яргъал йисара аялриз тербия гузвай тежрибалу муаллим Бабаева Имара Алиевнадиз, кIелунра хъсан агалкьунар авай ученицаяр тир Аликберова Музлифатазни Эмирбекова Каринадиз теклифна.
Сифте гаф школадин директор Хаиров Хаир Нажмудиновичаз гана.
И кьетIен суварин югъ тебрик авунин хуш келимайрилай гуьгъуьниз, ада школа цIийи кIелунин йисаз намуслувилелди гьазур хьанвайди лагьана.
Ада гьакIни вичин рахунра лагьайвал, Яралиев Имам Музамудиновича пул ахъайна школадин вири дакIарар дегишарнава, спортзал ремонтнава. Школадин ракIарарни полар дегишар хъувуна кIанзамайди, аялриз дерин чирвилер гун патал абурун къуллугъда хъсан муаллимрин педколлектив акъвазнавайди лагьана. Ада аялриз школадин хъсан адетар хуьниз, абур артмишуниз эвер гана.
Гуьгъуьнлай гаф чи меркездай атанвай багьа мугьман ДР-дин экономикадин ва социальный рекьяй вилик финин министр Эфендиев Исмаил Ибрагьимовичаз гана. Ада муаллимрин коллективдиз, аялриз ва кIватI хьанвай вирибуруз Чирвилерин югъ мубаракна. Анал гьакI диде-бубайрин патай Алимирзоева Назират, сад лагьай классдиз физвай аялрин муаллим Агъарагьимова Фазина рахана. Абуру чпин рикIе авай хуш келимаяр лагьана. Ахпа линейкадал сад лагьай классдиз физвай аялри шиирар хуралай кIелна.
ЦIийи кIелунин йис башламиш хьуникай хабар гузвай школадин сифте зенг ягъунин гьуьрметлу ихтибар цIи сифте яз школадиз къвезвай аялар - Мегьамедмирзоев Назирал, Мурадова Айишатал, Устаева Минаятал, Куьребеков Имранал авуна.
ЦIийи поселок. Чирвилерин суварин мярекат, адет хьанвайвал, ЦIийи поселокдин юкьван школадани хъсан тешкиллувал аваз кьиле фена. ЦIийи кIелунин йис башламиш хьуниз талукьарнавай шадвилин линейка, тебрикдин хуш келимаяр лугьуналди, классдилай къеце кIвалах тухунин рекьяй и мектебдин директордин заместитель Жинетханов Надир Жинетхановича ачухна ва сифте гаф школадин директор Ягъибегов Бег Абдулашимовичаз гана.
Ада вичин рахунра алатай кIелунин йисан нетижайрикай ва цIийи кIелунин йисуз школадин педколлективдин, кIелзавай аялрин ва абурун диде-бубайрин вилик акъвазнавай везифайрикай, школа кIелунин йисаз гьазур хьанвай гьалдикай куьрелди лагьана. 780 далай виниз аялри чирвилер къачузвай и мектебда цIи сифте яз партайрихъ 67 аял ацIукьдайди ва и кардиз виликамаз вири гьазурвилер акунвайди къейд авунихъ галаз санал ада бицIекриз чирвилерин алемриз сифте кам къачун мубарак авуна, мектебдикай абуруз кьвед лагьай хайи кIвал жедайди лагьана.
Эхирдай ада кIелзавайбуруз, муаллимриз, техработникриз, аялрин диде-бубайриз цIийи кIелунин йис башламиш хьун ва гьакIни Чирвилерин сувар рикIин сидкьидай мубарак авуна, тебрикдин гафар лагьана.
Гаф райадминистрациядин патай векилвилер гваз атанвай райондин «Куьредин хабарар» газетдин редактор Миметов Анварбег Асланбеговичаз гана. Вичин рахунра ада чи уьлкведин руководстводи образованидин месэладиз еке фикир гузвайди, вичихъ артуханвал авай «Образование» милли проект кардик акатнавайди ва алай йис Муаллимдин йис яз малумарнавайди, цIийи школаяр эцигунихъ галаз санал, мектебрин материально-технический база алай аямдин истемишунар фикирдиз къачуна мягькемаруниз, муаллимриз кIвалахдинни яшайишдин къулай шартIар яратмишуниз кьетIен фикир гузвайди къейд авунихъ галаз санал, чи райондин руководстводини чахъ авай 41 мектебда ремонтрин кIвалахар кьиле тухунин, абур цIийи кIелунин йисаз гьазурунин рекьериз пулунин еке такьатар чара авунвайди ва инлай кьулухъни и месэладиз кьетIен фикир гудайди, республикадин такьатрин гьисабдай къведай йисуз Эминхуьре школадин цIийи дарамат эцигиз эгечIдайди лагьана. Ада и месэладиз райондин газетдани еке фикир гузвайди къейдна.
Эхирдай ада райондин руководстводин ва гьакIни вичин патай школадин педколлективдиз, кIелзавай аялриз ва абурун диде-бубайриз цIийи кIелунин йис башламиш хьун ва гьакIни Чирвилерин сувар мубарак авуна.
Гуьгъуьнлай анал тебрикдин хуш келимаяр гваз кIелунинни тербиядин кIвалахдин рекьяй школадин директордин заместитель Н. И. Идрисова, диде-бубайрин тIварунихъай цIи сифте яз школадиз физвай аялдин диде Э. Ш. Мирзеханова, кIелунинни тербиядин кIвалах тухунин рекьяй директордин заместитель С. Т. Мирзеханов рахана. Эхиримжида гьакI муаллимар ва аялар школада кIелунин кIвалах сменайра кьиле тухунин къайдадихъ галазни танишарна.
Школада цIийи кIелунин йис башламиш хьун малумарунин лишан яз сифтегьан зенг ягъунин гьуьрметлу ихтибарвал 11-«а» классдин ученицаяр тир Гьуьсейнова Секнедални Саидова Шамсиятал ва 1-классдиз атанвай Алимирзоева Мегьрибанал авуна.
Курхуьр. Курхуьруьн 2-нумрадин мектебдин гьаятдиз къацу махпур хьиз векь акъатнавай чIурал 1-сентябрдиз гъилера таза цуькверни аваз, цIийи парталривди чIагурнавай аялар, абурун диде-бубаяр кIватI хьана. Чпи чпиз абуру чирвилерин суварин югъ мубаракзава.
ЦIийи кIелунин йис башламиш хьуниз талукь шадвилин линейка мектебдин тешкилатчи Гь. Шихбабаева ачухна ва ада вири муаллимрин тIварунихъай Чирвилерин сувар мубаракна.
Ахпа анал мектебдин директор Н. Алхасов рахана. Тебрик авунихъ галаз санал ада алатай кIелунин йисуз мектебдихъ кIелунра, общественный хийирлу крара, тербиядин рекье гьихьтин нетижаяр хьанатIа, цIинин кIелунин йисуз мектебдин вилик акъвазнавай везифайрикай кIватI хьанвайбур хабардар авуна, мектеб цIийи кIелунин йисаз гьазурунин карда гьалтай четинвилерикай, абур алудай рекьерикай лагьана.
Ахпа анал райадминистрациядин векил райондин пенсионный отделдин начальник Къачаев Магид рахана.
Гуьгъуьнлай анал и цIарарин авторни рахана сувар мубаракна, цIийи кIелунин йисаз талукьарнавай «Курхуьруьн муаллимар», «РикIел хуьх!» вичин шиирарни кIелна, мектебдин библиоте-кадиз «Зи хайи хуьр» ва «Сифте чубарук» ктабарни пишкешна.
Эхирдай 1-классдиз атанвай Ибра-гьимова Жанадини 11-классдин ученик Алхасов Алиди сифтегьан зенг яна.
М. Дибирован тIварунихъ галай Герейханован хуьруьн 2-нумрадин СОШ
Пакаман сятдин кIуьд. Школадин гьаятда хуьруьн гъвечIи-чIехи кIватI хьанва. Хъсандиз ремонтна, лацу асунарнавай школадин дарамат хкатна аквазва. Дараматдин цлал Къарамахида контро-террористический операцияда иштиракдайла телеф хьайи и школада кIелай милициядин старшина М. Дибирован мемориальный доскадин патав са декьикьада кисна акъвазнавай ученикар, диде-бубаяр гвай. Инал Россиядин ва Дагъустан Республикадин пайдахри ян гузвай, пионерар гьуьрметдин къаравулда акъвазнавай.
Россиядин Гимн яна. Шадвилин линейка школадин тешкилатчи З. И. Абуевади ачухна ва вирибуруз Чирвилерин сувар мубаракна. Гаф школадин директор С. Л. Гьасановаз гана. Ада вичин куьруь рахунра школада хъсан муаллимар авайдакай, аялриз дерин чирвилер гузвайдакай ва чи гьукуматди образованидиз еке фикир гузвайдакай лагьана.
- Эхь, школадин дарамат куьгьне хьанватIани, - давамна ада, - са жедай гьалда ремонтна, хъсан шартIар яратмишна. И кардал ученикрин бригада машгъул хьана. Абуру хъсандиз зегьмет чIугуна, школа цIийи кIелунин йисаз гьазурна. 38 муаллимди школада 172 аялдиз тарсар гун патал вири шартIар яратмишнава.
Шадвилин линейкадал рахай диде-бубаяр тир З. Алиметова, Т. Рамазанова ва масабуру цIийи кIелунин йис мубаракна, бицIекриз чирвилерин алемдиз – мектебдиз вегьезвай чпин сад лагьай кам мягькемди, абурухъ чандин сагъвал ва чпикай гьукуматдиз вафалу инсанар хьана кIанзавайди лагьана.
1-классдиз къвезвай 15 ученикдикай ибарат тир хорди ягъай манияр и мярекатдин иштиракчийриз гзаф бегенмиш хьана. И группадин руководитель тир Т. Разуева вичин патайни бицIекриз сувар мубаракна, хуш келимаяр лагьана.
11-классдин ученикри бицIекриз пишкешар гана.
Сифтегьан зенг 11-классдин ученица М. Наврузовадихъ галаз санал сифте яз школадиз физвай Гьасанов Сабира яна.
***
ЦIийи кIелунин йис башламиш хьуниз талукьарнавай шадвилин линейка Р. Османован тIварунихъ галай Герейханован хуьруьн 1-нумрадин юкьван школадани хъсан тешкиллувал аваз кьиле фена.