И йикъара райондин муниципальный тешкилатдин администрациядин заседанийрин залда алай йисан 10-октябрдиз Дагъустан Республикда сесер гунин сад тир йикъаз гьазурвал акунин месэлайрай семинар-совещание кьиле тухвана. Адан к1валахда администрациядин кьилин пешекарри, сечкидин комиссийрин председателри, хуьрерин администрацийрин кьилери, политический партийрин векилри, теклифнавай маса юлдашри иштиракна.
Семинар-совещание райондин администрациядин кьилин заместитель Савин Мирзоевич Велиева ачухна, кьилени тухвана. Ада къейд авурвал, «Дагъустан Республикада муниципальный сечкийрин гьакъиндай» республикадин Закондин бинедаллаз 2010-йисан 10-октябрдиз муниципальный сечкияр кьиле фида. Им алай йисан лап важиблу политический кампания я. Адан нетижайрилай Дагъустан Республика мукьвал тир вад йисуз яшайишдин, экономикадин ва общественный, политикадин жигьетдай вилик фин хейлин дережада аслу жеда. Сечкияр тухун патал чи районда и юкъуз сечкийрин 45 участокди кIвалахда. Анра 15 хуьруьн администрацийрин кьилер ва 162 кас чкайрин Собранийриз депутатар хкяда.
Семинар-совещание райондин сергьятдин сечкийрин комиссиядин председатель Къ. Къурбанмегьамедова, «Сад тир Россия» политический партиядин чкадин отделенидин руководитель Б. Ширинова, райондин администрациядин кьилин пешекар Р. Абдулазизова «Дагъустан Республикада муниципальный сечкийрин гьакъиндай» Закондин истемишунрикай, сечкийрихъ авай чIехи метлебдикай, сечкийриз гьазурвал акунин ва абур тухунин кIвалах тешкилунин барадай государстводин, чкадин самоуправленидин органрин вилик акъвазнавай везифайрикай ихтилатар авуна.
Гуьгъуьнлай анал Кьасумхуьруьн, Уллу Гъетягърин, ЦIийи Макьарин, АгъастIалрин муниципальный тешкилатрин кьилер тир Б. Бремова, З. Агъарзаевади, А. Къазиагьмедова, Н. Абдурагьманова, КIварчагърин муниципальный тешкилатдин кьилин пешекар М. Эскендарова чкайрал сечкияр тухуниз аквазвай гьазурвилерикай лагьана.
Эхирдай С. Велиева, Къ. Къурбанмегьамедова, Б. Ширинова семинар-совещаниидин иштиракчийрин са жерге суалриз жавабар гана.