«Куьредин хабарар» газетдин 26-нумрада чна ЦIийи поселокдай тир Разаханов Нисредина мукьвара Италияда ушудай кьиле фейи Европадин чемпионатда 1-чка кьурдакай хабар ганай. И йикъара Н. Разаханов чи газетдин редакциядиз мугьман хьана. Чна Европадин чемпиондивай са шумуд суалдиз жаваб гун тIалабна.
- Нисредин, сифтедай чна ваз Европадин чемпионвилин тIвар къачун мубаракзава. Вуна спортда сифте камар гьина къачуна?
- Тебрикдай чухсагъул. ЦIийи поселокдин юкьван школада кIелзавайла за 8 йисуз тренер Гьажибала Гьажибалаеван гъилик азаддиз къуршахар кьунай вердишвилер къачуна, районда ва республикада тухвай хейлин турнирра иштиракна.
Школа акьалтIарай 2007-йисуз зун Майкоп шегьердиз фена, Адыгеядин государстводин университетдик экечIна. Ана зун тренерар тир В. Василченкодин ва А. Шамраеван гъилик ушудал машгъул жезва.
- Ушудай вуна гьихьтин турнирра иштиракна? Анра гьихьтин нетижаяр хьана?
- Сифтедай за Майкоп шегьерда, Адыгея республикада тухвай чемпионатра гъалибвал къачуна, Вирироссиядин хейлин турнирра кIвенкIвечи чкаяр кьуна. Алай йисан январдин вацра Майкопда кьиле фейи Россиядин чемпионатда иштиракна, ана 2-чка кьуна. Идаз килигна зун Россиядин хкянавай командадик кутуна, заз Италиядин Рим шегьерда кьиле фидай Европадин чемпионатдиз путевка гана.
- Нисредин, заз вун Европадин чемпионатдикай са тIимил ачухдиз раханайтIа кIанзавай. Ана гьи уьлквейри иштиракна? Россиядин хкянавай командадик мад дагъустанвияр квайни?
- Санлай Россиядай Римдиз 12 спортсмен фенвай, абурукай 3 кас Дагъустандай тир. Чи спортсменри ана хъсан нетижаяр къалурна. Дагъустанвийрикай 2 касди 1 ва са касди приздин 3-чкаяр кьуна. Жувакай рахайтIа, Европадин чеипионатда зун 68 килограммдин заланвиляй майдандиз экъечIна. За Италиядай, Швейцариядай, Россиядай тир спортсменрин винел гъалибвал къачуна. Финалда зи къаршидиз Италиядай тир мад са спортсмен экъечIна. Къизгъиндаказ кьиле фейи гуьруьшда зун 3:2 гьисабдалди гъалиб хьана.
Европадин чемпионатда Россиядин, Испаниядин, Италиядин, Франциядин, Албаниядин ва маса уьлквейрин командайри иштиракна.
- Спортдин рекье гележегда вахъ гьихьтин планар ава?
- Мукьвал вахтара Вирироссиядин са шумуд турнирда иштиракда. Зулухъай Россиядин чемпионат кьиле фида. Зи къаст ана гъалибвал къачун ва Россиядин хкянавай командадик кваз дуьньядин чемпионатда иштиракун я.
- Спортдал машгъул хьуни вавай гзаф вахт къакъудзава – им якъин кар я. Юридический университетда кIелунни регьят кар туш. Са карди масадаз манийвал ийизвани?
- Гьелбетда, регьят я лугьуз жедач. ЯтIани зун спортдал машгъул жезни, акъажунра иштиракизни, хъсан къиметар аваз кIелунизни агакьзава.
Лугьуз кIанзава хьи, захъ галаз университетда дагъустанвийри, гьабурукай яз лезги гадайрини кIелзава. Абуруни кIелунра, общественный кIвалахра чешне къалурзава. Мисал яз, Кьасумхуьрелай тир Эмирбегов Арсена университетда хъсандиз кIелзава, амни ушудал машгъул жезва.
- Нисредин, эхирдай ихьтин суал гуз кIанзава. Гележегда вуна кIелна къачузвай пешекарвилин рехъ давамдани, тахьайтIа, спортдин?
- Гьелелиг атIай жаваб гуз жедач. Алай вахтунда кIелни ийизва, спортдин акъажунрани иштиракзава. Гележегда гьи рехъ хкядатIа вахтуни къалурда.
- Мад сеферда чна ваз къазанмишнавай агалкьун мубаракзава, чи мурад вахъ кIелуна ва спортда мадни чIехи агалкьунар хьун я.
Чи суалриз жавабар гунайни ваз чухсагъул!
- Куьнни сагърай