Алай йисан июлдин ва августдин варцар гзаф чкайра, гьабурукай яз Россиядин хейлин областра, республикайра лап чимибур хьанва. Чимивал 35-40 градусдив агакьзава. Пешекарри лугьузвайвал, ихьтин чимивилер Россияда тахьана 90 йис кьван жезва.
СМИ-дин такьатри хабар гузвайвал, Москвадин, Новгороддин, Самарадин, Саратовдин ва маса областра тамара, векьин уьруьшра цIаяр кьуна хейлин вахт я, адан майданар къвердавай артух жезва. ЦIу хейлин хуьрер кана, тахьай мисал авуна, 80-дав агакьна инсанар телефна. ЦIай Москвадиз, маса шегьерриз мукьва хьанва.
Чимивили, ракъини кул-кусар, чиле авай векь-кьал кьурурна алугарнава. Ида са касди кваз такьуна цIай квай спичкадин кьал, пIапIрусдин кьатI чилел гадарайтIа, цIай кьунал, еке бедбахтвилерал гъун мумкин я.
Чаз акурвал, чи райондани бязи инсанри мукъаятвал квадарнава. Советский хуьруьн къекъуьндилай райондиз къвезвай рекьин къерехда авай чIуруз амай никIиз, рекьин винел пата авай паласадиз цIай яна, канва. Алатай гьафтеда Герейханован хуьруьн I ва 2 –отделенийрин арада авай машмашин багъни (са шумуд гектар) кана. Им кьасухдай авур кар яни, я тахьайтIа хатадай хьайиди яни – и кар чавай лугьуз жедач. Гьар гьикI ятIани, багъ кана, еке зарар хьана.
Хьайи зарар арадал хкидалди, виликамаз адан вилик пад кьун регьят я. Гьавиляй гьар са кас лап чими, ракъини ва зегьемвили кузвай алай вахтунда мукъаят хьун лазим я.
