52 йисуз рикIерни сирер, муьгьуьббатни уьмуьрдин рекьер сад авуна хатурлудаказ яшамиш жезвай Рафим ва Шейрихан Селимоврин хзан Кьасумхуьрел жемятди гьуьрмет ийизвайбурукай сад я. Гьавиляй и хзандиз РФ-дин Президентди тайинарнавай «За любовь и верность» медаль гунни дуьшуьшдин кар туш.
И йикъара чун Селимоврин хзанда мугьманвиле хьана. Хзанда гьуьрмет, хуш рафтарвал авайди, Рафимни Шейрихан халис мугьманпересар тирди гьасятда кьатIуз жезва.
- Чи ери-бине Вини Арагърин хуьряй я, - лугьузва Рафим Абдулатифовича. – Чи бубаяр Кьасумхуьрел къазияр яз куьч хьайиди я.
КIвалин кайвани Шейрихан Муъминовна мугьманар кьабулунин къайгъуйрик хьуниз килигна, чна эвелдай Рафим Абдулатифовичахъ галаз адан уьмуьрдикай, зегьметдин рекьикай ихтилатар авуна. Малум хьайивал, 1929-йисуз дидедиз хьайи Р. Селимова 10-класс акьалтIарна, хуьруьн III-Интернационалдин тIварунихъ галай колхозда лежбервал авуна. Гуьгъуьнлай 3,5 йисуз армиядин жергейра къуллугъна. 1952-йисалай 1997-йисалди ада вичин кьисмет Кьасумхуьруьн консервиярдай заводдихъ галаз сад авуна – ана токарвиле кIвалахна.
- Гьа йисара завод вири уьлкведа тIвар-ван авай промышленностдин карханайрикай сад тир, - сугьбетзава Р. Селимова. – 13 сеферда завод КПСС-дин ЦК-дин, Министррин Советдин, ВЛКСМ-дин ЦК-дин, ВЦСПС-дин, 8 сеферда РСФСР-дин недай-хъвадай промышленностдин министерстводин гъиляй-гъилиз къведай Яру пайдахар гуниз лайихлу хьуни и кардин гьакъиндай шагьидвал ийизва.
Заводдикай ихтилат кватайла, чи суьгьбетдик вичини 15 йисуз ана емишар банкайра твадай цехда кIвалах авур Шейрихан Муъминов-нани экечIна.
- Гьич тахьайтIа, гьа йисара заводда са сменада 600 касди кIвалахзавай, - алава хъийизва Ш. Селимовади. – Идалайни гъейри, сезондин вахтунда заводдиз куьмек-диз 1000-дав агакьна студентарни гъизвай. Гьикьван лагьайтIани, халкьдиз кIвалах авай, зегьмет чIугуна арадал гъайи нетижайрал шадвал ийидай вахтар тир.
Ихьтин са кардикайни лугьуз кIанзава. Заводда токарвиле кIвалахзавай йисара Р. Селимова 15 йисуз заводдин халкьдин контрол-дин комитетдин председателвилин, 8 йисуз механический цехдин партийный организациядин секре-тарвилин везифаярни намуслудаказ кьилиз акъудна.
Яргъал йисара республикадилай яргъарани машгьурвал къазан-мишай заводда гьакъисагъвилелди зегьмет чIугунай Рафим Абдулати-фовичаз «Зегьметдин ветеран», В. И. Ленинан 100 йисан юбилейдин медалар, 20-дав агакьна грамотаяр, Шейрихан Муъминовнадиз «Зегь-метдин ветеран» медаль, «Соцсо-ревнованида гъалиб хьайиди», «Коммунистический зегьметдин зарбачи» знакар гана.
- Чун 1958-йисуз эвленмиш хьана, - хзандикай ихтилат давам-зава Шейрихан Муъминовнади. – И йисара чна сада-масадан, я чна веледрин, я веледри чи кефи ханач лагьайтIа, мумкин я куьн ягъунни тавун. ЯтIани, им гьакъикъат я.
Рафим ва Шейрихан Селимов-рихъ 3 велед хьана. Кьулан хва Назир, гьайиф хьи, чагъин яшара авай жегьил итим яз бедбахтвилин дуьшуьшдикди рагьметдиз фена.
ЧIехи гада Замира Москвада педуниверситетда преподава-телвиле, Марата Махачкъалада са карханада отделдин начальниквиле кIвалахзава.
Рафим Абдулатифовичахъ ва Шейрихан Муъминовнадихъ 6 хтул ва 2 птулни ава. Хтулрикай Анаради ДГУ-дин юридический факультет Яру дипломдалди, Зоядини Луизади Москвадин чилерин кадастровый академия акьалтIарнава, Луизади аспирантурада кIелун давамзава.
- Патарал яшамиш жезватIани, гадаяр, хтулар мукьвал-мукьвал чал кьил чIугваз хуьруьз хуьквезва, чаз гьар са карда куьмекар гузва, - лугьузва Ш. Селимовади. – Чпелай Аллагь рази хьурай.
Лезгистандин хуьрера чпел баркалладин таж алай ихьтин хзанар, гьа хзанрани гьуьрмет, бахт-берекат артух хьурай!