Вири чкайра хьиз, райондин образованидин учрежденийрани 2010-2011-кIелунин йисаз гьазурвилер аквазва. «Образование» милли проект уьмуьрдиз кечирмишун яз, райондин 33 школа интернетдик кутунва. Ида образованидин учрежденийриз «Школадин сад тир партал» проектдикай менфят къачуналди, образованидин гегьенш майданриз экъечIдай мумкинвал гузва.
Мадни, Дагъустан Республикадин образованидин ва илимдин министерстводи чара авуналди, АгъастIалрин, Кьасумхуьруьн 1-нумрадин, АгъастIал къазмайрин, ЦIийи Макьарин ва Чуьхверхуьруьн СОШ-риз 45 компьютер хканва.
РУО-дай чаз гайи делилралди, цIийи кIелунин йис башламишдалди райондин школайриз 3 миллион манатдин къимет авай партаяр, доскаяр, стулар ва маса эменни хкида.
Школайра дараматар ремонт авунин кIвалахарни кьиле тухузва. И кIвалахра муаллимри, школайрин техработникри ва чIехи классра кIелзавай аялри активвилелди иштиракзава.
Алай йисуз Кьасумхуьруьн 1 ва 3-нумрайрин аялрин бахчайрин дараматар ремонт авун планламишнава.
Къейд авун лазим я хьи, Эминхуьре школадин цIийи дарамат эцигунни къведай йисан пландик кутунва. И кар патал республикадин бюджетдай пулунин такьатарни чара авунва.