И мукьвара, 6-июлдиз, КТВ программадиз килигай зун, заз чиз амай вири тамашачиярни, рикIерик шад гьиссер кутадай вакъиадин шагьидар хьана.
Чи машгьур чIехи шаир СтIал Сулейманан тIварунихъ галай, шумудни са баркаллу рухвайри тIвар мадни виниз хкажзавай райондиз урус писатель А.В. Костюнин мугьман хьана.
Карелия республикадай тир писатель Александр Викторович Костюнин чи райондиз атунин себеб вуч тиртIа КТВ-дай гайи интервью акур юлдашар гъавурда гьатна. Зун мягьтелни шадни авурди а кар я хьи, алай художественный ктабар артух кIел тийизмай йисара, урус литературадин тарсарай алава яз ганвай материалар дерин анализ ийиз алакьна, абурукай вири уьлкведин школайрин А. В. Костюнинан произведенийрай сочиненияр, шиирар ва мсб. кхьинин рекьяй малумарнавай конкурсда чи райондин хуьрерин муаллимар ва абуру тарсар гузвай аялар тафаватлу хьун.
А.В. Костюнин Герейханован хуьруьн 2-отделенидин ва Курхуьруьн юкьван школайрин конкурсда иштирак авур аялрихъ ва абуруз урус чIаланни литературадин тарсар гузвай муаллимрихъ галаз гуьруьшмиш хьана, яргъалди ихтилатар авуна. Эхирдай ада вич чи муаллимри чпин фикирар лап хъсан урус чIалал лугьунал гьейран тирди лагьана.
За чирайвал, Куьрхуьруьн 1-нумрадин юкьван школадин ученица Къурбанисмаилова Аксанади сочинение кхьенвай «Рукавичка» гьикаяни муаллимдикай ва ада тарс гузвай аялрикай я. Анай чаз аялдин уъмуьрда муаллимди гьихьтин роль къугъвазватIа аквазва. А.В. Костюнинан а гьикая за виридаз кIелун теклифзава. Зи фикирдалди, Аксана тафаватлу хьун адан муаллимди аялриз тарсунин мана ачухарунин рекье еке зегьмег чIугун, вичин кIвалах рикI гваз авун, муаллимвилин тежриба генани артухарун тирди чир жезва. Муаллимдин тIвар михьиз хуьзвай, ам генани вини дережадиз хкажзавай, чпелай чи гележег аслу тирди чизвай гьар са муаллим кьегьал я. Аферин ва чухсагъул ахьтин муаллимриз!
