Хзандин гьакъиндай государстводин политика уьмуьрдиз кечирмишунин программадин сергьятда аваз Россияда 2008-йисалай июлдин вацра хзандин, кIанивилин ва вафалувилин суварин югъ къейд ийизва. Суварин тешкиллувилин комитетдин кьиле РФ-дин Президентдин уьмуьрдин юлдаш С. В. Медведева акъвазнава.
И суварихъ галаз алакъалу яз РФ-дин Президентдин Указдалди кIанивили ва вафалувили агъавалзавай хейлин хзанриз «За любовь и верность» медалар гана. Абурун арада 52 йисуз санал гьуьрметлудаказ яшамиш жезвай Кьасумхуьрелай тир Рафим ва Шейрихан Селимоврин, 11 аял хана чIехи авур ЦIийи поселокдай тир Сабир ва Бесхалум Мегьамедоврин хзанарни ава. И кьве хзанни мукьвара райондин УСЗН-дин начальник Ж. Б. Бремова кьабулна. Хзандин, кIанивилин ва вафалувилин суварикай, уьлкведа хзанрин гьакъиндай ийизвай къайгъударвиликай гегьеншдиз лугьунихъ галаз сад хьиз, Ж. Бремова Селимоврин ва Мегьамедоврин хзанрив РФ-дин Президентдин Указдалди тестикьарнавай махсус медалар ва удостоверенияр шад гьалара вахкана, абуруз и наградаяр мубаракна, хзанра гьуьрмет-хатур, вафалувал хьана кIанзавайди лагьана.