1-июлдиз Дербент шегьердин администрацияда «Сад тир Россия» политический партиядин Дербент шегьердин чкадин отделенидин Политсоветдин заседание хьана. Анал шегьердин отделенидин исполкомдин секретарь Мурад Мурадова малумарайвал, «Дербент шегьер» округдин кьилин къуллугъдал хкядай сечкийра иштиракун патал «Сад тир Россия» партиядин шегьердин отделенидин членри исятда Дербент шегьердин администрациядин кьилин везифаяр тамамарзавай Имам Яралиеван кандидатура къалурнава. Сечкияр алай йисан 10-октябрдиз кьиле фида.
Заседанидал рахай Политсоветдин членар Гьасан Гьасановани Валерий Юнатова И. М. Яралиеван регьбервилик кваз администрацияди къанун-къайда мягькемарунин, шегьерда хъсанвилихъди дегишвилер тунин жигьетдай тухузвай рехъ халкьди кьабулнавайди ва дуьзди тирди къейдна.
- «Сад тир Россия» партиядин членри вирида сад хьиз зи тереф хвена сесер гун заз гзаф хуш я, -лагьана Имам Музамудинович Яралиева. - Куьне заз еке ихтибарзавайди, за гьиссзава. ЯтIани, зун жуван ва администрациядин коллективдин кIвалахдал санлай рази туш.