Алим, юрист, журналдин редактор

Сифтедай заз Ислам Рамазанован уьмуьрдин рекьел куьрелди акъвазиз кIанзава. Ам 1977-йисуз Махачкъала шегьерда дидедиз хьана. Ада юкьван школа, 1999-йисуз Москвада управленидин государственный университет, 2003-йисуз Москвадин финансовоюридический академия (юрист пешедай) акьалтIарна. Гуьгъуьнилай Ислам Рамазанович Рамазанова «Автоваздин» къурулушда хатасузвилин къуллугъдин аналитический отделда, «Расчет», «Москвоский бухгалтер», «Российский налоговый курьер» журналрин, гьафтеда садра акъатзавай пешекарвилин «Учет. Налоги. Право» газетдин редактор-экспертвиле, «Экономические преступления» журналдин отделдин редакторвиле кIвалахна.
2009-йисуз И. Рамазанова «Налоговые преступления. Теория и различные аспекты правоприменительной практики в современной России» темедай диссертация хвена ва юридический илимрин кандидатвилин тIвар къачуна.
2005-йисалай инихъ И. Рамазанова, чна винидихъ лагьайвал, са жерге юридический изданияр акъудзавай «Актион-Медиа» ЗАО-дин орган тир «Уголовный процесс» журналдин кьилин редакторвиле кIвалахзава.
20I0-йисан журналдин 3-нумрада Ислам Рамазановича кхьизвайвал, гьар гьафтеда акъатзавай «Уголовный процесс» журналдин 5 йис тамам хьана. И йисара журналдин чинра агъзурдалай виниз материалар чапна, гзаф кьадар месэлаяр къарагъарна, абур гьялдай рекьер къалурна.
- Журнал, са рахунни алачиз, уголовно-правовой къурулушдин пешекарри кьабулнавай, тестикьарнавай изданиедиз элкъвенва, - кхьизва кьилин редакторди.
За журналдин 6-нумрадиз акъатнавай материалра вил  экъуьрна. Абур прокурорар, судьяяр, адвокатар, гьар са кас патал менфятлубур тирди кьатIуз жезва. Мана-метлебдиз дерин, кьилди къачур-тIа, «Участие адвоката в суде при решении вопроса о законности обыска», «Особенности уголовно-правовой квалификации», «Изготовление подложного кассового чека: возможности и препятствия для привлечения к уголовной ответственности», «Уголовный процесс на бумаге и в жизни» ва ихьтин маса кьилер ганвай хейлин материалар журналда Ислам Рамазановича вичини кхьенва.
Чи ватанэгьли кьиле акъвазнавай журналдин нумрайрихъ галаз таниш жедайла за ихьтин са кардизни фикир гана: журналдин редакционный советдик дуьньяда, уьлкведа тIвар-ван авай юристар, судьяяр, алимар ква. Ихьтинбурукай яз чавай РФ-дин Верховный Суддин председателдин заместитель В. П. Веринан, Рф-дин Верховный Суддин судьяяр тир Н. А. Колоколован, А. С. Червоткинан, РФ-дин Конституционный Суддин советник, юридический илимрин доктор, профессор А. В. Смирнован, Москвадин адвокатрин «Сословие» коллегиядин адвокат, Россиядин гьуьрметлу адвокат Н. П. Ведищеван ва масбурун тIварар кьаз жеда.
Ихьтин зурба пешекаррихъ галаз кIвалах авуни Ислам Рамазанович вични пешедин рекьяй устад, дерин чирвилер авай юрист, редактор тирдан гьакъиндай шагьидвал ийизва.
Лагьана кIанда хьи, бажарагълу юрист, журналист-редактор тир И. Р. Рамазанован материалар Россиядин ва къецепатан маса уьлквейрин массовый информациядин такьатризни акъатзава. ИкI, зи гъиле Ислам Рамазановичан макъалаяр авай «Человек и закон» журналдин, РФ-дин адвокатрин федеральный палатадин орган яз акъатзавай «Новая адвокатская газета» газетдин са шумуд нумра гьатна. Абурукайни И. Рамазановахъ юриствилин, журналиствилин рекьерай бажарагъ, устадвал, пешекарвилин чIехи дережа авайди аквазва.
Эхирдай ихьтин са кардикайни лугьуз кIанзава. Исламан дах Рамазана Москвада «Брынцалов» фирмада кьилин пешекар, диде Сефижата Москвада са больницада кьилин духтур яз кIвалахзава.
Кьегьал хва Ислам Рамазановичахъ кIвалахда, гьар са карда агалкьунар хьун чи мурад я.