ТIебиатдин къанун я: са куьнизни килиг тавуна, вахтуни виликди еримишда. Гьар са вахтунихъни вичиз хас лишанар, вичин кьетIенвилер ава. Ингье гадни тамамвилелди вичин ихтиярда гьатнава. Ида хуьруьн майишатдин карханайрин, зегьметчийрин къайгъуярни артухарнава.
- Чуьлдин кIвалахрин лап къизгъин алай вахтунда райондин зегьметчийри багъларани уьзуьмлухра, саларани производстводин амай хилера жуьреба-жуьре кIвалахар кьиле тухузва, - лугьузва УСХ-дин начальник М. Бабаева. – Идахъ галаз санал, алай вахтунда магьсулдарар агакьнавай гад агудунивни эгечIнава.
УСХ-дай чаз гайи делилралди, алай йисуз хуьруьн майишатдин карханайри 368, лежбервилинни фермервилин майишатри 394, арендаторрини агьалийри 788 гектардин никIерай гад кIватI хъувун лазим я.
Районда виликамаз гад кIватI хъувунин кIвалахдин план-график туькIуьрнава. Адан бинедаллаз комбайнерри, са кьилихъай башламишна, карханайрин, КФХ-рин ва арендаторринни агьалийрин никIерай гад агудда. И кардал карханайрин ва кьилдин ксарин 12 комбайн желбнава.
Сифтегьанбурукай яз районда «Арсен» КФХ-да техил кIватIна акьалтIарна. Юкьван гьисабдалди гьар са гектардай 20 центнердилай виниз техил кIватIнава.
Алай вахтунда «Даркуш» ОАО-ди вичихъ авай 60 гектардай гад агудзава. Чаз акурвал, никIера техилдин хъсан бегьер агакьнава.
«Кюре-Агро» МТС-дин са комбайниди и йикъара Вини СтIалрин хуьруьн участокда КФХ-рин, арендаторрин никIерай техилар кIватI хъийизва.
Са комбайниди Курхуьруьн никIера гад агудзава.
Техилар кIватI хъувунихъ галаз санал, карханайра, КФХ-ра, арендаторрин никIера самар туьквера кьазва, абур хутахиз фермайрин патарив таяйра твазва, гад агудай никIера ва чIурухъан чкайра къведай йисан бегьердин бине кутун патал цанар цазва.
Районда гад агудунин кIвалахар къвердавай йигин жезва.
