Малум тирвал, алай йисуз чи районда Дагъустандин политехнический колледждин Кьасумхуьруьн филиал кардик акатна 12 йис тамам жезва. И девирда адаз ара датIана регьбервал гузвай ва вич райондин хуьрерин гадайризни рушариз чкадал юкьван махсус пешекарвилер къачудай мумкинвал яратмишиз алахъай Султанов Гьасан Абдулагьядовичалай аялрин диде-бубайри еке разивал ийизва, адаз ва ина тарсар гузвай амай муаллимризни чухсагъул лугьузва.
И йикъара ДПК-дин Кьасумхуьруьн филиалда анин выпускникрив колледж акьалтIарунин гьакъиндай дипломар шад гьалара вахкана.
И филиалдин завуч Баламирзоев Шихбала Межидовича вичихъ галаз авур суьгьбетдин вахтунда къейд авурвал, ина экономический ва юридический 2 отделение кардик ква. 4 группада аялриз тарсар гунал 10 кас муаллимар машгъул я. Алай йисуз и кьве отделенида 98 аялди кIелзавай. ДПК акьалтIарайбурун жергедай тир Савзиханова Гуьлпериди ва Эрзиманова Саидади анин экономический отделение яру дипломралди куьтягьна.
Вич кардик акатайдалай инихъ и филиалди 10 выпуск ахъайна ва 500 касдилай виниз пешекарар гьазурна. Ина кIелзавай аялриз стипендияр, хзанрин гьал четинзавайбуруз ва гьакIни етимриз пулунин пособияр гузва. Гадаяр ана кIелзавай вахтунда армиядиз тухузвач.
Алай вахтунда ана цIийи кIелунин йис патал аялар кьабулзава.
Экономический отделенидиз 11-класс акьалтIарай ва юридический отделенидизни 9-класс акьалтIарайбур, яш фикирда кьазвач. Филиал райцентрдал ала.
Гьакъикъатдани райондин центрдал ДПК-дин филиал кардик акатуни гьам кIелзавай аялар, гьамни абурун диде-бубаяр патал еке къулайвал яратмишнава.