Алатнавай кIелунин йис Курхуьруьн 2-нумрадин юкьван школадин коллектив патал бегьерлуди ва яргъалди рикIел аламукьдайди хьана. Мектебдин директор Дагъустандин халкьдин муаллим Небиюлагь Алхасова суьгьбет авурвал, цIи ина вири санлай кьурла 168 аялди кIелзавай. Абурукай 154 аял классдай гуьгъуьнин классдиз акъатна. Амай 14 да юкьван мектеб кIелна куьтягьна. Еке шадвилелди а кIвалах къейд ийиз кIанзава хьи, выпускникрикай пуд касди- Къагьриманов Камала, Давудова Альбинади, Гьажимурадова Лейлади- мектеб къизилдин медалралди куьтягьна.
3-июлдиз школадин директорди медалистрив, муаллимрин иштираквални аваз, аттестатар, къизилдин медалар ва талукь тир сертификатарни шад гьалара вахкана. Муаллимрини медалистриз и чIехи агалкьун мубаракна, и вакъиа рикIел аламукьун патал санал шикиларни яна.
Гила выпускникар кIелиз фидай чкайрин къайгъуйрик ква. Кьилди къачуртIа, Камалаз пограничникар гьазурдай Москвадин высший военный училищедик, Альбинадиз ДГПУ дик, Лейладиз Дербентдин медучилищедик экечIиз кIанзава. ЛагьайтIани жеда, абур пудни чпи хкянавай кIелдай чкайрин студентар я. ГьикI лагьайтIа, абурухъ чпивай ийизвай истемишунризни шартIариз жаваб гузвай артуханвилер, ЕГЭ-дин виниз тир баллар ва олимпиадайрин нетижайрин артуханвални ава. Чна абуруз пудазни ва гьакI амай выпускникризни чпиз хъсан рехъ хьурай лугьузва.