Курхуьрелай тир Гьажиева Бесхалуман тIвар медениятдал рикI алайбуруз фадлай хъсандиз таниш я. Культработник, райондин культурадин Дворецдин художественный самодеятельностдин иштиракчи яз ада 40 йисалай виниз халкьдиз къуллугъна. Гзаф кьадар фестивалрин, килигунрин лауреат тир Б.Гьажиевадин яргъал йисарин бегьерлу зегьмет Дагъустан Республикадин культурадин лайихлу работник лагьай тIвар гуналди къейдна.
Лагьана кIанда хьи, Бесхалум Гьажиевадин кар- халкьдиз медениятдин рекьяй къуллугъ авун- адан руш Селимата давамзава. Селиматни бажарагълу культработник, тIвар- ван авай манидар я.
Эхиримжи 15 йисуз С.Гьажиевади райондин культурадин Дворецда методиствиле кIвалахзава. Вичин хиве авай асул везифаярни ада намуслудаказ кьилиз акъудзава. Амма гзафбуруз Селимат вичихъ кьетIен ва ширин сес авай манидар яз чида. И рекьяйни адахъ гзаф йисарин тежриба ава. С.Гьажиевадин иштираквал авачиз районда шадвилин гьич са мярекатни кьиле физвач лагьайтIа, зун кIусни ягъалмиш жедач. Идалайни гъейри, ам «Эминан сес», «Лезгистандин авазар» ва хейлин маса фестивалрин, килигунрин лауреат я.
С.Гьажиевадиз Кьасумхуьрелни Белижда, Ахцегьани Кьурагьа, Дербентдани Махачкъалада, Къубадани Хачмасда ва гзаф маса чкайра капар яна.
С.Гьажиевади райондин культурадин Дворецдин патав тешкилнавай фольклордин «Куьре» ансамблдин кIвалахдани активвилелди иштиракзава.
Халкьдин рикI алай манидар С.Гьажиевади лугьузвай хейлин манияр лентиниз къачунва, абур «Юждаг», «НТБ», «Рубас», «КТВ- Кьасумхуьр», «Аран» ва Кьиблепатан Дагъустандин районринни шегьеррин маса телеканалри мукьвал- мукьвал чпин концертрин программайрик кутазва.
Культработник ва манидар тир Селимат Гьажиевади эхиримжи вахтара вичин алакьунар шииратдин рекьени ахтармишзава. Са шумуд шиирдиз чкадин композиторри музыкани кхьенва.
- Гьакъикъатдани, Селимат вах вичин дидедал атанвай руш я,- лугьузва райондин культурадин Дворецдин директор В.Мусаева.
