И йикъара Кьасумхуьрел РФ-дин журналистрин ва лезги писателрин союзрин член, фотокорреспондент, «Куьредин хабарар» газетдин штатдик квачир мухбир Райсудин Набиеван 70 йис тамам хьуниз талукьарнавай шадвилин мярекат кьиле фена. «Куьредин ярар» культурадин центради ЛПС-дин райондин отделенидихъ галаз санал тешкилнавай ам «Куьредин хабарар» газетдин культурадин отделдин зеведиш А.Камилова ачухна, Р.Набиеван уьмуьрдин ва яратмишунрин рекьерикай гегьеншдиз суьгьбетна. Ада къейд авурвал, тежрибалу муаллим хьиз, Райсудин Набиев райондин ва республикадин газетрихъ галаз саки 55 йисуз сих алакъа хуьзвай мухбирни я. Эхиримжи вахтара ада прозадин ва шииратдин рекьени бегьерлувилелди кIвалахзава. Идан нетижа яз мукьвара юбилярдин «Хуьруьн тарих» ва шиирринни прозадин «Сифте чубарук» ктабар чапдай акъатна.
Шадвилин мярекатдал юбилярдиз хуш келимаяр писателар ва шаирар тир Ш.Шабатова, Т.Мегьамедова, Х.Кьасумова, С.Саидгьасанова, В.Жамалдинова, «Куьредин ярар» культурадин центрадан руководитель А.Агьмедпашаева ва маса юлдашрини лагьана, чпин патай адаз пишкешар гана.
«Куьредин хабарар» газетдин редакциядин коллективдини Р.Набиеваз 70 йисан юбилей мубаракзава ва адахъ уьмуьрда, яратмишунра агалкьунар хьана кIанзава.