Алай йисан 20-23-июндиз чи районда «Родные языки в системе общего образования в условиях нового образовательного законодательства Российской Федерациии» темадай семинар кьиле фена. Европадин Советдин гуьзчивилик кваз ва саналди тир пландин бинедаллаз кьиле тухузвай и мярекат тешкилайбур «Институт национальных проблем образования» коммерческий тушир автономный организация, Россиядин образованидинни илимдин министерстводин образование вилик тухудай федеральный институтдин образованидин милли месэлайрал машгъул центр ва «Сулейман-Стальский район» муниципальный тешкилат тир.
Райадминистрацияда кьиле фейи и семинар райондиз атанвай мугьманар тебрик авуналди ва образованидин къурулушда милли чIаларалди тарсар тухуниз фикир гузвай гьалдал гегьеншдаказ акъвазуналди, райондин депутатрин Собранидин председателдин заместитель, алим Абдулмуталибов Нариман Шамсудиновича ачухна ва кьиле тухвана.
Семинардал адан иштиракчийрин тIварцIихъ ракъурнавай Россиядин образованидин академиядин милли образованидин месэлайрин рекьяй Илимдин Советдин Председатель, РАО-дин член – корреспондент, образованидин милли месэлайрин институтдин Президент М. Н. Кузьминалай ва милли месэлайрин рекьяй Госдумадин комитетдин председателдин сад лагьай заместитель А. Г. Баскаевалай атанвай тебрикдин чарар кIелна.
Семинардин кIвалахда Дагъустан Республикадай, Москвадай атанвай 81 кас мугьманри ва гьакIни чи райондин школайрин сифтегьан классра хайи чIалан тарсар гузвай (гьакI урус чIаланни) 55 муаллимди иштиракна.
Семинардал гьялзавай кьилин месэладай «Умуми образованидин къурулушда государстводин ва милли чIалар» темадай образование вилик тухунин Федеральный институтдин образованидин милли месэлайрин Центрдин руководитель, биологиядин илимрин кандидат Артеменко Ольга Ивановнади, «Дагъустан Республикада чIалар авай гьал» темадай филологиядин илимрин кандидат Абдулмуталибов Нариман Шамсудиновича, «Сулейман-Стальский район» муниципальный тешкилатдин умуми образованидин идарайра кIелунин кIвалах тешкилнавай гьалдин гьакъиндай» темадай «Сулейман-Стальский район» муниципальный райондин образованидин управленидин начальник, тарихдин илимрин кандидат Асланов Жабраил Агъамирзоевича, «ЦIийи образовательный законодательстводин шартIара хайи чIалар чирун тешкилнавай гьалдин гьакъиндай» темадай школаяр патал кхьенвай са шумуд ктабдин автор, Дагъустандин школайрин лайихлу муаллим Абдулмежидов Абдуселим Абдулмежидовича метлеблу гегьенш докладар авуна.
Гуьгъуьнин юкъуз семинардал Магьарамдхуьряй тир тежрибалу муаллим Фахрудин Насрединова «Дагъустан Республикада кIелунин планрин гьакъиндай», педагогикадин илимрин кандидат Анзорова Светлана Петровнади «Этнокультурная компетентность учителя в условиях двуязычной образовательной среды» темадай, чIалан муаллимар тир Герейханован хуьруьн 1-нумрадин СОШ-дин кьилин категориядин муаллим Сегьерхалум Османовади, Агъа СтIалрин СОШ-дин муаллим Мадина Стальскаяди, Кьасумхуьруьн 1-нумрадин СОШ-дин муаллим Фазина Агъарагьимовади, ЦIийи поселокдин СОШ-дин муаллим Сабират Мегьамедрагьимовади чпин кIвалахдин тежрибадикай учебный планрин, школаяр патал акъудзавай са бязи ктабрин ва учебный пособийрин гьакъиндай чпин фикирар лагьана, бязи теклифар гана.
Анал О. И. Артеменкади «Функциональное и юридическое равноправие языков народов России» темадай авур докладни фикир желбдайди хьана.
Семинардин сергьятра аваз урус ва хайи чIаларай, тарихдин, Дагъустандин халкьарин культурадай тарсар, гьакIни интегрированный тарсар тухунин жигьетдай мастер-классар тешкилна, ачух тарсар кьиле тухвана.
Семинардин пленарный заседанидал Дагъустан Республикадин школайра милли чIаларалди тарсар кьиле тухунин кIвалах хъсанарунин жигьетдай са жерге рекомендацияр кьабулна.
Семинардал гьялай месэладай гегьенш материалар чна чи газетдин гуьгъуьнин нумрайра гуда.