ТIебиатдин шартIариз килигайла чи районда багъманчивал вилик тухудай, емишрин бул бегьерар гьасилдай вири жуьредин мумкинвилер ава. Алатай асирдин 70-80-йисара багъманчивили райондин экономикада кьилин чкани кьазвай. Тек са Герейханован тIварунихъ галай совхоздихъ 700 гектардилай виниз багълар авай.
Гьайиф хьи, эхиримжи 20-25 йисан къене районда багъларин кьадар лап тIимил хьана, гьасилзавай емишрин кьадар агъуз аватна.
Яваш-яваш районда багъманчивал кIвачел ахкьалдарзава. «2012- йисалди АПК вилик тухун» тIвар алаз районда кьабулнавай программада карханайри, КФХ-ри ва чилин участокар яргъал муддатда арендада къачунвай кьилдин ксари гьар йисуз кутун лазим тир багъларин кьадарар къалурнава, и кардал райондин талукь къуллугъри гуьзчивални ийизва.
Мукьвара райондин са шумуд хуьруьз, карханадиз фейила чаз акурвал, фермервилинни лежбервилин майишатрихъ галаз санал, багълар кутазвай кьилдин ксарин кьадарни къвердавай артух жезва. ИкI, Герейханован хуьре чун арендатор- багъманчи Къараханов Расимахъ (шикилда) ва адан кIвалахрихъ галаз мукьувай таниш хьана.
Чаз малум хьайивал, Дербентдин хуьруьн майишатдин техникум куьтягьайдалай гуьгъуьниз Р.Къараханова 29 йисуз Герейханован тIварунихъ галай совхозда багъманчивилин бригададин бригадирвиле, отделенидин управляющийвиле кIвалахна. И йисара адахъ, бригададихъ кIвалахда агалкьунарни хьана. Идан гьакъиндай кIвенкIвечи багъманчидин шикил саки 15 йисуз райондин ва республикадин Гьуьрметдин доскада хьуни шагьидвал ийизва.
Совхоз чкIайла, Расима 10 гектар ичин багълар арендада къачуна, вилик йисара кутунвай анаг къайдадиз хкана, кьуранвай тарарин чкадал цIийиз къелемар акIур хъувуна. Иесивилелди гелкъуьн тешкилнавай багъди гьар йисуз емишрин тарифдин бегьерни гузва.
Идалайни гъейри, Р.Къараханова 2007-йисуз 1,5 гектар чил 49 йисан муддатда арендада къачуна, ана шефтелин, ичин багълар кутуна. Чаз акурвал, багъ хъсан гьалда ава, къелемар хкатунар авачиз экъечIнава, абурун пунариз пер янава, миянардай шейэр кутунва, ятар ганва. Багъдай арендаторди 300 туьк векьерни кIватI хъувуна.
Чун инанмиш хьайивал, Р.Къараханов зегьметдал рикI алай, чилин къадир авай багъманчи я. Умудлу я, гъавурда аваз зегьмет чIугвазвай, багълара агротехникадин гьар са серенжем галай- галайвал ва чпин вахтара кьиле тухузвай арендатордихъ- багъманчидихъ гележегда кIвалахда мадни хъсан нетижаяр жеда.