«Шарвилидин» сувар ава Ахцегьа

…Пакаман сятдин 7- далай СтIал Сулейманан райондин хуьрерин, организацийрин, карханайрин векилар Советский хуьруьн кьилихъ Дагъустандин халкьдин шаир СтIал Сулейманаз эцигнавай памятникдин- паркунин патав кIватI жез башламишна. Са сят вахтни алатнач, кьиле муниципальный райондин кьилин везифаяр тамамарзавайди тир Штибег Гьажимегьамедович Мегьамедханов ва райондин Собранидин председателдин заместитель Нариман Шамсудинович Абдулмуталибов аваз райондин векилар авай машинрин еке цIиргъ Ахцегьар галайвал рекье гьатна. Багъларин юкьва авай Магьарамдхуьр, Къуюстанар, Чепер, Кркар ва маса хуьрер кьулухъ туна, машинри виликди еримишзава. Такабурлу ва гурлу Самур вацIал алай яргъи ЦIехуьлрин муькъвелай элячIайла ЦIийи Къаракуьре, Мискискар, Усугъчай гьалтзава. Са патахъай кьакьан дагъларин кIаняй, муькуь патахъай Самур вацIун кьилелай фенвай тик, къекъвей рекьяй винелди физвай инсанрин рикIер, салари, кул- кус авай ягъвари, гьатта са затIни экъечI тийизвай кьакьан дагълари, яргъай хъсандиз кьатIуз жезвай, жив ацукьнавай Шалбуз дагъди аладарзава. ТIебиатдин шикилрал гьейранвал ийиз, рехъ акуна- такуна акъатна. Ингье, Дакъузпара район куьтягь хьана, Ахцегь район башламиш жезвай сергьятдал алай Гъурун кIамун майданни. Анал «Ахцегьвийри Шарвилидин ватанда мугьманар тебрикзава», «Куьн хвашгелди, азиз мугьманар», «Шарвилидин сувар мубаракрай» гафар кхьенвай плакатар ала. Ахцегь райондин регьберри, милли парталар алай школьникри, зуьрнейрай лезги туьнт авазар язавай музыкантри, цIудралди районэгьлийри и майдандал мугьманар хушвилелди кьабулзава. Вилик зиринг атлуяр кваз машинрин яргъи цIиргъ атана агакьна. Абурай эвичIай багьа мугьманрив- «Шарвили» эпосдин сувар тухунин тешкиллувилин комитетдин председатель, «Дербент шегьер» шегьердин округдин Кьилин везифаяр тамамарзавайди тир Имам Музамудинович Яралиевав, Дагъустан Республикадин Халкьдин  Собранидин Председателдин заместителар Насир Алиевич Гьайдаровав, Николай Юрьевич Алчиевав, РД- дин Халкьдин Собранидин депутатрив, районрин кьилерив, маса жавабдар ксарив цуьквер вугана. Майдандал гуьруьш- тебрик, мани- макьам, кьуьлер сад- садак какахьай са герендилай машинрин цIиргъ Ахцегьихъ ахмиш хьана. Ингье кьуд пад михьна, куьчеярни майданар суварин мана- метлеб къалурзавай лозунгралди, плакатралди, пайдахралди безетмишнавай, сиверал хъвер алай инсанар яшамиш жезвай къадим Ахцегьар. Кьилин В.Ленинан тIварунихъ галай куьчеда Мегьарамдхуьруьн симинин пагьливанри чпин гьунарар къалурзава, спортдин Дворецдин вилик акъажунрин милли жуьрейрай жегьилри чпин къуватар алцумзава … Жуьреба- жуьре серенжемар и юкъуз акьван хьана хьи, гьа са вахтунда абур вири гуьзчивилик кутаз хьун мумкин тушир.
Валентин Эмирован тIварунихъ галай паркуна аялрин Яратмишунрин кIвалин, художественный, музыкадин ва искусстводин школайрин коллективрин яратмишунрин хсуси кIвалахрин выставкаяр ачухнавай.
Суварин йикъара адет тирвал пайдахралди, айванрилай вегьенвай халичайралди безетмишнавай куьчейрай фена, гурлу вацIал алай ракьун муькъвелай элячIна, инсанар 400 кIарцIин яргъи ва къекъуьнарни тиквал квай гурарай Ахцегьрин кьилин ярж- лишан тир КIелез хивел хкаж хьана. Кьисайрай гуя Шарвили, адан тур гьана фарикъат я, гьавиляй ахцегьвийри анаг зиярат яз гьисабзава. Алатай йисуз Шарвилидиз гуьмбет яз анал зурба ротонда эцигнай. Анал рахай Имам Музамудинович Яралиева ва «Ахцегь район» муниципальный райондин Кьил Сафидин Наврузалиевич Мурсалова «Шарвилидин» эпосдихъ халкь ватанперес яз тербияламишунихъ авай чIехи метлебдикай, ротонда- им Шарвили пагьливандин гьуьндуьр къаматдин пак руьгьдин ва къадим заманайра анал хкажнаваз хьайи адан къеледин лишан тирдакай лагьана.
КIелез хивелай эвичIна, шадвилер тешкилнавай районрин майданрал фейидалай гуьгъуьниз мугьманар ва вири жемят Шарвилидин суварин кьилин мярекат къурмишзавай чкадал- Валентин Эмирован тIварунихъ галай ял ядай паркуниз-багъдиз кIватI хъхьана. Гзафбуру чIехи сегьнедин вилик эцигнавай скамейкайрал чкаяр кьуна. Тарарин серинрик къурмишнавай столрихъ тIуьн- хъун тешкилнавай инсанрин кьадарни тIимил тушир. Республикадин массовый информациядин такьатрин векилрин къайгъуярни къалин тир.
Суварин шадвилин мярекат, куьруь гаф рахуналди ва мугьманар тебрик авуналди, «Ахцегь район» муниципальный райондин Кьил Сафидин Наврузалиевич Мурсалова ачухна.
- Гьуьрметлу мугьманар, райондин агьалияр!- лагьана ада.- Къе чна 11- сеферда лезги халкьдин игитвилин «Шарвили» эпосдин сувар кьиле тухузва. Са шакни алачиз, ам лезги, Кьиблепатан Дагъустандин халкьарин уьмуьрда кьетIен вакъиадиз элкъвенва. Нубатдин сеферда чун чи агалкьунрал, ийиз алакьнавай баркаллу крарал дамахиз, виликди фидай цIийи рекьер тайинариз кIватI хьанва. Лугьуз кIанзава хьи, сувар тухунин къайдаярни метлебар йис- сандавай хъсанвилихъ дегиш ва хуьквезвай мугьманрин кьадарни артух жезва. Акьалтзавай несил ватанпересвилин, зегьметкешвилин, ахлакьдин, пак ерийрин руьгьдаллаз тербияламишунин, Дагъустандин стха халкьарин  дуствилин алакъаяр мягькемарунин, милли культура вилик тухунин михьи ниятар- къастар аваз гьар йисуз къейдзавай сувар кьиле тухуник къуьн кутазвай республикадин руководстводиз, суварин тешкиллувилин комитетдиз, кьилди Имам Музамудинович Яралиеваз пара кьадар сагърай лугьуз кIанзава заз.
Сувар ачухунин лишан яз Россиядин Федерациядин Гимн яна.
Гаф «Шарвилидин» суварин тешкиллувилин комитетдин председатель Имам Музамудинович  Яралиеваз гана.
- Гьуьрметлу мугьманар, суварин иштиракчияр, играми дустар! - лагьана  Имам Музамудиновича. - Игитвилин «Шарвили» эпосдин сувар чна къадим ва пак Ахцегьрин чилел 11 сеферда къейд ийизва. Виликан 10 йис акуна- такуна акъатна. Шарвилидин кьегьалвилери, адан жанлу руьгьди, Ватандин, халкьдин патай адаз авай гьуьндуьр дережадин кIанивили чун адалатлувал патал, чи уьмуьр лап хъсандиз дуьзмишун патал вилик еримишунрал датIана ашкъиламишзава. Сувар мад сеферда  мубарак авунихъ галаз санал, зун инанмиш тирвал, и сувар чна къенлай кьулухъни къаршиламишда. «Шарвилидин» сувар тухун-ам  гьакъикъатдани халкьдин руьгь сагъар хъувуниз, къанажагълувал, фагьум-фикир артухаруниз барабар кIвалах я.
- Гьуьрметлу юлдашар!- лагьана микрофондихъ атай Дагъустан Республикадин Халкьдин Собранидин Председателдин заместитель Николай Юрьевич Алчиева.- «Шарвили» эпосдин сувар тухун Ахцегь райондин тарихда кьетIен вакъиа я. Республикадин Президентдин, Халкьдин Собранидин, Гьукуматдин ва кьилди жуван патай квез и югъ мубаракрай! Республикада надир пипIерикай сад тир Шарвилидин ватан бубайрилай атанвай хъсан адетралди, дуьньяда лезги халкь машгьур авур алимралди, пагьли-ванралди, игитралди, инкъилаб-чийралди, камаллу, мергьаметлу, мугьманперес инсанралди, милли тарихдинни медениятдин гуьмбет-ралди, масанра акван тийир кьетIен чешнейралди тафаватлу я. Ибуру чи игитвилин алатай девирар ва Шарвили хьтин игитар чпел гьуьндуьр дережадин чешнеяр, руьгьдин магълуб тежер къуват яз хьайиди ва яз амукьдайди мад сеферда тестикьарзава. Квез мад сеферда и сувар мубаракрай!
Шадвилин мярекатдал рахунар куьтягь хьайидалай гуьгъуьниз сегьне манидар гъетерин гъиле гьатна. Концертдин чIехи программа Ярагьмед Ярагьмедова ва Наира Рамазановади устадвилелди кьиле тухвана. Ахцегьрин Культурадин Дворецдин патав гвай вокальный ансамблди тамамарай нумраяр, ДР- дин халкьдин артист Тарлан Мамедова, Дагъустандин филор-мониядин солист, республикадин ва Вирироссиядин хейлин фестивалрин лауреат  Руслан  Пирвердиева,  тIвар-ван авай гьевескар Магьира Шири-новади ва маса артистри лагьай манияр «Шарвилидин» суварин иштиракчийри гурлу капар ягъунал-ди  тебрикна.
…Ахцегьа игитвилин «Шарвили» эпосдин суварин мярекатар нянин  сятдин 9-даз КIелез хивяй цавуз гужлу фейерверкар ягъуналди куьтягь хьана.