«Шарвили» эпосдин сувар кьиле тухуз вири Дагъустандин пипIерай азиз мугьманри Ахцегьиз рекьер атIуз цIи 11 йис тамам жезва. Еке вакъиа патал им еке тарих, еке мензил туштIани, халкьди ам ашкъидивди кьиле тухузва.
Алай йисуз «Шарвили» эпосдин сувар 26-июндиз кьиле фидайдакай хабар ганва. Мугьманри мад сеферда Ахцегьиз рекьер атIуда.
- Малум тирвал, - лугьузва МР-дин администрациядин культурадин ва информациядин управленидин начальник, бажарагълу шаир М. Б. Бабаханова, - 11 йисан вилик кьиле Агьед Агъаев, Имам Яралиев аваз лезгийрин вилик- кьилик квай ватанперес ксарихъ галаз меслят хьана, оргкомитет тешкилна. Ахпа аник чи алимар, гьукуматдин къуллугъчияр ва маса ксарни ахкатна. Милли эпосдин сувар кьиле тухузвай 11 йисан къене ам вирибуру кьабулнавай хъсан адетдиз элкъуьриз алакьун чи халкьдин кьилин винизвал, тарихда хьайи зурба пагьливанризни кьегьалриз чна ийизвай еке гьуьрмет я ва жегьил несил дуьз тербияламишдай гужлу къуват я. «Шарвили» сувар йисалай-суз жанлу, метлеблу жезва, вучиз лагьайтIа, чун гьар йисуз адак са метлеблу цIийивал кутаз алахъзава. ИкI, алатай йисуз КIелед хивел Шарвилидиз бахшнавай ротонда, художественный мектебдин вилик машгьур скульптор Аскар- Сарыджадиз бюст ачухна, хъийидай зурба кIвалахар фикирдик мадни ква.
Вири и крари чун, Шарвилидин невеяр, адан веси кьилиз акъудиз чалишмиш жезвайдан гьакъиндай шагьидвалзава. Адан весида лагьанва:
Халкьдин фикир сад хьурай,
РикIин мурад фад жеда.
Маса чара амач квез,
Сад хьайитIа, шад жеда!
Дарда гьатай чIавуз заз
Пуд сеферда гьарайрай:
«Шарвили, фад агакьа!»-
Лагьана зи суракьрай!
Гьакъикъатдани, чаз гележегда Ватан хуьдай, халкьдин азадвал, аслу туширвал хуьдай, герек атайтIа, чандилайни гъил къачуз гьазур тир игит рухваяр- аскерар герек я. «Шарвили» эпосдин асул идея ватанпересвиликай, Ватан хуьникай ибарат я.
Къейд ийиз кIанзава хьи, Ахцегьа гьар йисуз кьиле тухузвай «Шарвилидин» суварик СтIал Сулейманан райондин вишералди агьалийри активвилелди иштиракзава. Мад сеферда «Шарвилиди» мугьманриз теклифзава Ахцегьиз. Зун кIевелай инанмиш я: чи районэгьлийри и теклиф фадлай вилив хуьзвай, гила ам кьабулни ийида, суварик ашкъидивди иштиракда. Гьавиляй заз жуван макъалани чи бажарагълу шаир Сажидинан шиирдин цIараралди куьтягьиз кIанзава:
Ша, дагъвияр, шадвал ийиз суварик,
Лекьери хьиз гар кутан чи луварик.
Гьикьван дамах гватIа тамаш цаварив!
Куьз лагьайтIа, къагьриман я Шарвили!
Лезги халкьдин эрзиман я Шарвили!
