Дагъустан Республикадин Гьукуматдин куьмекдалди РД-дин тIебиатдин ресурсрин ва экологиядин министерстводи гьазурна республикадин газетринни журналрин типографияда чапдай акъуднавай «Дагъустандин Яру ктаб» (набататар ва гьайванар) вичиз тешпигь авачирди хьанва.
Республикада ва уьлкведа тIвар-ван авай алимрин куьмекни галаз РФ-дин илимдин лайихлу деятель,Россиядин экологический академиядин гьакъикъи член, биологиядин илимрин доктор,профессор Г.М.Абдурагьманова гьазурнавай ктабда тIебиат,набататрин ва гьайванрин алем хуьнин гьакъиндай кьабулнавай РФ-дин ва РД-дин законар, къарарар, кодексар, гьакIни кьериз-цIаруз гьалтзавай, чеб амукь тавунин къурхуллувал арадал атанвай набататрикай ва гьайванрикай делилар гьатнава.Абурни РАН-дин ДНЦ-дин биологический ресурсрин Прикаспийский институтдин, РД-дин прикладной экологиядин институтдин, Дагъустандин Государственный университетдин биологиядин ва экологиядин факультетдин, РАН-дин ДНЦ-дин Горный ботанический бахчадин ва КаспНИРХ-дин алимрин советдин саналди тир заседанидал набататрикай ва гьайванрикай кIватIнавайбур я.
«Дагъустандин Яру ктабда» набататрин ва гьайванрин гзаф кьадар шикилар ганва.
Ктаб неинки экологар, ботаникар, зоологар патал,гьакI тIебиатдал,набататрин ва гьайванрин алемдал рикI алай гьар са кас патал менфятлу я
552 чиникай,57, 96 шартIунин печатный листиникай ибарат тир ктабдин тираж 2000 экземпляр я.