Гьар са вахтунихъ вичин лишанар, кьет1енвилер ава. Ингье, гадни алукьнава, ам яваш- яваш тамамвилелди вичин ихтиярда гьатзава. Гад- им хуьруьн майишатдин карханаяр, зегьметчияр патални чуьлдин к1валахрин къизгъин вахт я. Кьилди къачурт1а, алай вахтунда уьзуьмлухрани багълара, ник1ерани салара агротехникадин серенжемар тухунихъ галаз санал, хуьруьн майишатдин карханайра, лежбервилинни фермервилин майишатра, гьак1ни кьилдин ксари чпин участокра общественный ва хсуси малар, лапагар патал алаф гьазурзава.
Райондин УСХ- дай чаз гайи делилралди, алатай йисуз районда 24300 тонн векъи алаф, гьа гьисабдай яз 22500 тонн векьер гьазурнай. Ц1инин йисуз и кьадардилай артух алаф хьун гуьзлемишзава. Вучиз лагьайт1а, ц1и векьин чкаяр дигидай цикай я карханайриз, я кьилдин ксариз дарвал хьанач. Йисни марфар къвадайди хьана. Гьавиляй багълара, ч1урухъан чкайра, векьин уьруьшра булвилелди векьни хьана.
Дарк1ушрин, Чуьхверхуьруьн, Ц1ийи Макьарин, Эминхуьруьн, Герейханован, Агъаст1алрин къазмайрин хуьрера карханайри, лежбервилин майишатри, кьилдин ксари векьер яна, абур туькра кьуна, чкайрал хутахна саки акьалт1арнава.
Мукьвара К1варчагъ дереда командировкада авайла чаз акурвал, анин хуьрерани алафар гьазурунин к1валахар тешкиллувилелди кьиле физва.
Хуьруьн майишатдин карханайра, хуьрера алафар гьазурунин к1валахар давам жезва.
