Аялар хуьнин международный йикъаз талукь яз Кьасумхуьрел алай хзанриз ва аялриз социальный жигьетдай куьмек гудай Центрада «Аялвал- им сувар я» лишандик кваз утренник кьиле тухвана. Аниз етимар тир, набуд, гьакIни гзаф аялар авай ва тIимил таъмин хзанрай тир 50 аялдиз, гзаф аялар авай дидейриз теклифнавай.
Мярекат Центрадин социальный рекьяй пешекар Гьажиева Татьянади ачухна ва кьиле тухвана.
Анал тебрикдин гафар гваз ЦСПСД ГУ- дин директордин заместитель Алиева Имара, райондин УСЗН- дин хзандин отделдин зеведиш Магьмудова Шамсият, духтур- педиатр Къазанбегова Сижарат, диде- бубайрин патай гзаф аялар авай диде, вичи етим кьве аялдиз къаюмвал ийизвай Шихрагьимова Индира (АгъастIалрин къазмаяр) ва Хидирова ФатIимат (Алидхуьр) рахана.
Шадвилин мярекатдал аялри манияр лагьана, хуралай шиирар кIелна, гъвечIи сегьнеяр къалурна. Идалайни гъейри, аялрин арада асфальтдал шикилар чIугунай ва кьуьлер авунай конкурсар тухвана. Анра иштиракай вири 50 аялдизни пишкешар гана.
Утренникдилай гуьгъуьниз аялар патал ширинлухар, сокар алай столар ачухна.
Гуьгъуьнилай аялар экскурсиядиз тухвана. Лагьана кIанда, шадвилин мярекат тухуниз райондин Федеральный суддин председатель Айбатов Мегьамедзагьид Мегьамедмирзоевича ва ЦСПСД ГУ- дин директор Шихбабаев Мурсал Шагьабудиновича спонсорвал авуна.