Райондин Куьре патан гъвечIи хуьрерикай сад тир Салиянрин хуьруьн агьалийрихъни дяведин цIай галукь тавуна амукьнач. Садбур дяведа телеф хьана, садбур хуьруьн къене зегьметдин рекье.
Ихтилат салиянви Рамазанан руш Саиматакай ва ада етимвиляй экъечIна арадиз гъайи муаллимар тир веледрикай физва.
Балакишиева Саиматан дах Рамазаназ са гадани 2 руш авай. Гада са акьван яш тахьанмаз залан азардик телеф хьана. Саиматан са йисни тахьанмаз дах Рамазан колхоздин никIе цан цадайла гишинвиляй ярх хьана, куьтендик акатна, рагьметдиз фена. Саиматан 6 йис хьайила дидени рагьметдиз фена. Диде- бубадикай магьрум хьайи кьве вах чпин амле Мегьамедкъазидини адан уьмуьрдин юлдаш Анахалума хвена. Кьве вахни колхоздин никIерани, фермайрал чпивай алакьдай кIвалахар ийиз хьана.
ЧIехи вахан кьисмет Кьасумхуьрелай, Саиматан Векьелрилай жагъана. Векьелрал Саиматан хала Ширинат яшамиш жезвай, ада вичин вахан руш вичиз аквадай чкада хьун патал гьаниз хутахна.
Векьеларви бажарагълу муаллим Гьасан Саиматал эвленмиш хьана. Саимата адаз куркурар хьтин пуд хва хана, тербияламишна. Адан юлдашди Векьелрал, гуьгъуьнлай Кьулан СтIалдал тIвар- ван авай гьуьрметлу муаллим яз кIвалахна.
Етим аял яз, Саиматаз кIелдай мумкинвал хьанач, адалай хуьре 3 класс кIелиз алакьна.
Саимат Рамазановнадин рухвайри, сусари гьуьрметдивди Гьасанан рехъ давамарзава. ЧIехи гада Агъарагьима Векьелрал карчи яз кIвалахзава. Фатулагьа Сардархуьруьн юкьван школада физкультурадин муаллим яз, Дагъустандин педагогвилин институтдин филологиядин отделение куьтягьна, Темирхан гьа и школада завуч я, ада ДГУ- дин физикоматематический факультет куьтягьна.
Саиматан пуд хцин хзан са гафунал, са кардал акъваздай, гьуьрмет- хатур хуьдай, гъиле- гъил кьуна сад хьиз зегьмет чIугвадай хзанрикай я. Чеб векьеларвияр ятIани и хзандиз Сардархуьре, школада гьуьрметзава. Абуру кIвалер Векьелрин гуьзел тIебиат алай чилел эцигнаватIани, Кьулан СтIалдални, райондани абур чин тийидай кас авач.
