Азар чIугурда-лай гуьгъуьниз бедендиз къуват хтун патал са стакандавай цIранвай мур-кIадин це хуьрекдин кьве тIурунавай апельсиндин миже, 1/2 чайдин тIурунавай кьел сад- садак какадарна, йикъа кьве сеферда са стаканда авайди ишлемишда.
Туьтуьнин хтунин цIумаруфрик (щитовидная железа) азар акат тавун патал гьазурзавай хуьрекрик гьамиша йод квай кьел кутун лазим я.
Ивидин давление къайдадик кухтун ва куьлуь дамарар михьи авун патал са килограмм рябинадиз (чIухлумпIрин жуьре) кило песок вегьена, хъсандиз тIур яда. Ахпа йикъа пуд сеферда чайдин са тIурунавайди ишлемишда.
Кьулан тарцин грыжа авайла, ксудалди вилик кьулан тарцин кIарабривай пихтадин ягълу гуьцIда, ахпа а чкайрал виртIедик какадарнавай мелгьем (мумие) эцигда.
Шекердин азар авайбуруз гьар юкъуз дарчинар квай чай хъун меслят къалурзава.
ДуркIунра къванер ва песок авайла, гьар са кишмишдин къене чIулав истивутдин хар туна, 2 вацран къене гьар юкъуз вад кишмиш ишлемишда.
Мукьвал- мукьвал кьил элкъвез хьайитIа, лацу кьил чичIек як регъведай машиндай авадарда. Са стакандавай (250 г) регъвенвай чичIекдиз 250 грамм вирт яна, хъсандиз хкуьрда, ахпа йикъа пуд сеферда фу недалди зур сят амаз хуьрекдин са тIурунавайди, пуд лагьай тIур ксудалди вилик ишлемишайтIа хъсан я.
Хамуник цIарнах (экзема) квайла, гьар юкъуз йикъа 2-3 сеферда фу тIуьрдалай гуьгъуьниз михекрин (гвоздика) цуькведин са тIур ишлемишайтIа, экзема яваш- яваш михьиз квахьда.
Хамуник азар квайла, гьар юкъуз чичIек ва серг ишлемишун меслят къалурзава. Абуру микробар рекьизва, иви михьи ийизва ва гьакIни санлай бедендин гьал хъсанарзава.
Мекьивилелай азарлу хьанвайла, кIерецдин хвехвер, кишмишар, кьурурнавай машмашдин патар гьар сад 0,5 кг ва гьакIни чкалар аламай, цилер хкуднавай кьуд лимон як регъведай машиндай авадарна, хъсандиз тIур яна, банкадиз вегьена, холодильникда хуьда. Ахпа гьар юкъуз хуьрекдин са тIурунавайди хуьрек тIуьрдалай гуьгъуьниз ишлемишда.
Диатез авай аялриз къацу ичиникай куьмек жеда. Ич са суткада морозильникда эцигда, ахпа ам, хъуьтуьлар хъувуна, аялдив нез тада. Гьа икI са вацран вахтунда. Ич иллаки къацуди хьун лазим я.
Кьилин мефтIедин давление авайла, йикъа пуд сеферда хуьрекдин са тIурунавай чIухлумпIрик чайдин са тIурунавай вирт хкуьрна неда.
Сивяй пис ял татун патал, хуьрекдин кьве тIурунавай некьийрин пешерал 2 стакандавай ргазвай яд илична, 15 декьикьада къалпагъ алай катулда тада. Ахпа ам куьзна, фу тIуьрдалай кьулухъ сиве экъуьрда.
