И йикъара Кьулан СтIалдал Россиядин Игит Радим Халикьов рикIел хкуниз талукь яз райондин командайрин арада волейболдай турнир кьиле фена. Санлай райондин хуьрерай аниз 11 команда атанвай.
Тешкиллувилин месэлайрилай гуьгъуьниз спортсменар командаяр тирвал Халикьован памятникдин вилик линейкада акъвазна, ам рикIел хкана, ахпа акъажунрин кьилин судья Алимов Алима райондин Собранидин депутат Алискеров Назимаз командаяр турнирдиз гьазур тирдакай рапорт гана.
Вичин нубатдай Н. Алискерова турнирдин метлебдикай, жегьилар тербияламишунин, спортдал желб авунин ва турнир хъсандиз кьиле фена вичин метлебдихъ агакьуникай лагьана. Анал гьакI хуьруьн администрациядин кьил Къехлеров Гьажимет, школадин директор Абдусемедов Анвар, Игитдин стха Халикьов Насир рахана.
Турнирдиз спонсорвал хуьруьн администрацияди, Халикьоврин хзанди, «1000 мелочей» туьквендин коллективди ва райондин Собранидин депутат Алискеров Назима авуна. Турнирдин тешкиллувилин кIвалахар Игитдин чIехи стха Насира, адан буба Абдулхаликьа кьилиз акъудна.
Турнирдиз атай вири командаяр графикда къалурнавайвал чеб-чпихъ галаз гуьруьшмиш хьана. Кьулан СтIалринни Курхуьруьн командаяр финалдиз акъатна. Финалда Кьулан СтIалрин команда гъалиб хьана.
1, 2 ва 3-чкаяр Кьулан СтIалрин, Курхуьруьн ва Кьасумхуьруьн командайри кьуна.
Талукь тирвал абуруз 12, 8, 5 агъзур манат пул, Кьулан СтIалрин командадиз турнирдин кубок (ам Радиман буба Абдулхаликьа вахкана), медалар, грамотаяр гана. Турнирда лап викIегьвал, бажарагъ къалурай спортсменар тир Э. Алимирзоеваз, М. Къужаеваз, Т. Небиюлаеваз, Я. Яхияеваз, М. Сирхаеваз, К. Бабаеваз, З. Алиеваз, М. Османоваз С. Сагьидоваз, Р. Велибековаз ва масабуруз кьилдин пишкешар гана.
